ރަޝިއާ އާއި ޔުކްރޭން މަޝްވަރާއަށް އެއްމޭޒުދޮށަށް ޖަމާވެއްޖެ އެވެ. ރަޝިއާގެ އަސްކަރީ ފައުޖުތަކުން ޔުކްރޭނަށް އަރައިގަނެ މުޅި ގައުމު ސުންނާފަތި ކުރަމުން ގެންދާތާ ފަސްދުވަސް ފަހުން ދެގައުމުން މިހާރު އެއްވެެ ތިބީ ހާލަތުން އަވަހަށް މިންޖުވެވޭނެ ގޮތެއް ހޯދުމުގެ އުންމީދުގަ އެވެ.
ރަޝިއާ ބުނާ ގޮތުން މަޝްވަރާއަށް އޮތް ފުރުސަތު ރަޝިއާ ބަންދެއް ނުކުރެވެ. މިބުނުމާއެކު ރަޝިއާގެ ވަފުދު އެއްދުވަސް ކުރިން، އާދީއްތަ ދުވަހު ބެލަރޫސްގެ ބޯރަށް ގޮސް ތިބީ ތައްޔާރަށެވެ. ޔުކްރޭންގެ ވަފުދަށް ދެވޭވަރުވީ މިއަދެވެ.
ރަޝިއާއިން އެތައް ފަހަރަކު މަޝްވަރާއަށް ދިން ފުރުސަތު ޔުކްރޭނުން ބޭނުންހިފާފައެއް ނުވެ އެވެ. ހަނގުރާމަ ފެށި ރަޝިއާ ފައުޖުތައް ޔުކްރޭންގެ ވެރިރަށް ކިއެވްއަށް މިސްރާބު ޖެހުމުން ޔުކްރޭނުން ވަނީ މަޝްވަރާ ކުރާނެ ކަަމަށް ބުނެފައެވެ.
ޔުކްރޭނުން އެންމެ ފަހުން މަޝްވަރާއަށް އާނއެކޭ ބުނީ ބެލަރޫސްގެ ރައީސް އެލެގްޒެނަދްރު ލުކަޝެންކޯ، ޔުކްރޭންގެ ރައީސްއަށް ފޯނުކުރައްވައި އާދޭސް ދެންނެވުމުންވެ.
ލުކަޝެންކޯ ޔުކްރޭންގެ ރައީސް ލަޑިމިއާ ޒީލިއަންސްކީ އަރިހުގައި ވިދާޅުވި ކަމަށް ވަނީ ރަޝިއާއާ އެކު އެއްބަސްވެވޭ ގޮތަކަށް އެއްބަސްވެގެން ނަަމަވެސް ގައުމު ސަލާމަތް ކުރެއްވުމަށެވެ.
އެވަގުތަކު ވެރިއަކަށް ހުންނަވާ މީހަކަށް އިޚުތިޔާރުތަކެއް އޮންނަ ކަމަށް ވިދާޅުވެ ލުކަޝެންކޯ ވިދާޅުވީ މަސްލަހަތު އިޚުތިޔާރު ކުރެއްވުމަށް ވުރެ ބުއްދިވެރި ގޮތެއް ނޯންނާނެ ކަމަށެވެ.
ރަޝިއާ އާއި ޔުކްރޭނާ ދެމެދު މިހާރު ކުރިއަށްދާ މަޝްވަރާތައް އަދި އޮތީ ވަރަށް ޅަފަތުގަ އެވެ. ނުކުންނޭ ނަތީޖާއެއް އަންދާޒާ ކުރާކަށް ނޭނގެ އެވެ. އެހެންކަމުން ނޫސް އެޖޭންސީތަކުން ވަކިގޮތެއް އަދި ރިޕޯޓެއް ނުކުރެ އެވެ.
ރަޝިއާގެ ރައީސް ލަޑިމިއާ ޕޫޓިން ވިދާޅުވެފައި އޮތީ ރަޝިއާގެ ސަލާމަތާއި މިނިވަންކަން ކަށަވަރުނުވާހާ ހިނދަކު ކޮޅެއްގައި ޖައްސާފައި ނޫނީ ހަނގުރާމަ ހުއްޓައި ނުލާނެ ކަމަށެވެ.