ބޭންކް އޮފް މޯލްޑިވްސް (ބީއެމްއެލް)ގެ ޗީފް އެގްޒެކްޓިވް އޮފިސަރުގެ ގޮތުގައި ހުންނެވި މރ. ކާލް ސްޓުމްކަ ބީއެމްއެލްގެ މެނޭޖިން ޑިރެކްޓަރުގެ މަގާމަށް މިއަދު އައްޔަންކުރައްވައިފި އެވެ.
ސަރުކާރުން ފޮނުވާ ނަންތަކެއް ދިރާސާކުރުމަށްފަހު ސަރުކާރު ހިއްސާވާ ކުންފުނިތަކުގެ ޑިރެކްޓަރުންގެ ބޯޑަށާއި ކުންފުނިތަކުގެ ޗެއާމަނުންނާއި މެނޭޖިން ޑިރެކްޓަރުގެ މަގާމަށް ބޭފުޅުން އައްޔަންކުރަނީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިންނެވެ.
އަލް އަހްލީ ބޭންކް އޮފް ކުވައިތުއާ ގުޅިވަޑައިގެންނެވުމުގެ ކުރިން ކާލް ހުންނެވީ ބަހުރެއިންގައި ހުންނަ ބޭންކް މަސްކަޓް އިންޓަނޭޝަނަލްގެ ރީޖަނަލް ކޯޕަރޭޓް ޑައިރެކްޓަރު މަގާމުގަ އެވެ. އެ މަގާމުގައި އޭނާ ވަނީ އެ ބޭންކުގެ ކޯޕަރޭޓް، ކޮމާޝަލް، އެސްއެމްއީ އަދި އިސްލާމިކް ބޭންކިން ހިދުމަތްތައް ބަލަހައްޓަވާފަ އެވެ. އޭގެ އިތުރުން ކާލް ވަނީ ބާކްލޭސް ބޭންކް މޮރިޝަސްގެ ރީޖަނަލް މެނޭޖިން ޑިރެކްޓަރު، އިންޑިއަން އޯޝެންސްގެ މަގާމުވެސް އަދާކުރައްވާފަ އެވެ.
ކާލް ވަނީ ބާކްލޭސް ބޭންކް ޓެންޒޭނިއާގެ އެގްޒެކްޓިވް ޑައިރެކްޓަޝިޕްގެ މަގާމު ވެސް ފުރުއްވާފަ އެވެ. އަދި އެކި އިދާރާތަކުގައި ނޮން އެގްޒެކްޓިވް ޑައިރެކްޓަޝިޕްގެ މަގާމުތައް ވެސް އަދާކުރައްވާފައިވެ އެވެ. މީގެތެރޭގައި މަނީ އޮން ޑިމާންޑް، ބާކްލޭސް ލީސިން އަދި ބާކްލޭސް ބޭންކް ސީޝެލްސް ހިމެނެ އެވެ.
ކާލް އަކީ ޗާޓަޑް އިންސްޓިޓިއުޓް އޮފް ބޭންކާސްގެ ސައުތު އެފްރިކާ އެސޯސިއޭޓެކެވެ. އޭނާ ވަނީ ޔުނިވާސިޓީ އޮފް ސައުތު އެފްރިކާއިން އެކައުންޓިން ސައިންސްގެ ރޮނގުން ބެޗެލާސް ޑިގްރީ ހާސިލްކުރައްވާފަ އެވެ. ފްރާންސް، ސްވިޒަލޭންޑް އަދި ސައުތު އެފްރިކާގައި އޭނާ ވަނީ އެގްޒެކްޓިވް ޕްރޮގްރާމްތައްވެސް ފުރިހަމަކުރައްވާފަ އެވެ.
ޕީސީބީގައި މިއަދު އޮތް ރަސްމިއްޔާތެއްގައި ބީއެމްއެލްގެ މެނޭޖިން ޑިރެކްޓަރުގެ މަގާމަށް ކާލް އައްޔަންކުރައްވާ އޭނާއަށް މަގާމުގެ ލިޔުން ހަވާލުކޮށްދެއްވީ ޕީސީބީގެ ރައީސް އާސިފް އަހްމަދު އެވެ.
ބީއެމްއެލްގެ ސީއީއޯގެ މަގާމަށް ކާލް އައްޔަންކުރީ މިދިޔަ އޮކްޓޫބަރު މަހުގެ ދެވަނަ ހަފްތާގެ ތެރޭގަ އެވެ.
ކާލް މީގެކުރިން ވިދާޅުވި ގޮތުގައި ބޭންކުގެ ބޯޑާއި އެގްޒެކްޓިވް މެނޭޖްމަންޓުގެ އިތުރުން މުވައްޒަފުންގެ އެހީތެރިކަމާއި އެއްބާރުލުމާއެކު ބޭންކުގެ ސްޓްރެޓެޖީގެ ލަނޑުދަނޑިތައް ހާސިލުކުރުމަށް މަސައްކަތްކުރައްވާނެ އެވެ.
"އަޅުގަނޑުމެން ކުރާ ކޮންމެ ކަމެއްގައި އެންމެ މުހިންމު އިސްކަމެއްދޭނީ ކަސްޓަމަރުންނަށް. އީޖާދީ ބަދަލާއި އިތުރު ފުރިހަމަކަމެއް ބޭންކުގެ ޕްރޮޑަކްޓްތަކާއި ހިދުމަތްތަކަށް ގެނެސް ކަސްޓަމަރުން އުއްމީދުކުރާ ވަރަށް ވުރެ ފެންވަރު ރަނގަޅު ހިދުމަތެއް ދިނުމަކީވެސް އަޅުގަނޑުމެންގެ އަމާޒު" ކާލްއާ ހަވާލާދީ ބީއެމްއެލް އިން ބުނެފައިވެ އެވެ.
ބީއެމްއެލް އަކީ ވަރަށް ކާމިޔާބު ތާރީހެއް އޮތް ބޭންކެއް ކަމަށާއި ބޭންކާއި ބޭންކުން ރައްޔިތުންނަށް އެހީތެރިވުމަށް ކުރާ މަސައްކަތުގައި ބައިވެރިވުމަށް ތައްޔާރަށް ހުރި ކަމަށް ކާލް ވަނީ ވިދާޅުވެފަ އެވެ.
ކާލްގެ ކުރިން ބީއެމްއެލްގެ ސީއީއޯގެ މަގާމު ހުންނެވީ އިނގިރޭސިވިލާތުގެ ޓިމް ސޯޔާ އެވެ.