އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ވިލާ ގުރޫޕްގެ ޗެއާމަން އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ނަމުގައި ޓްރޭޑިން ސްކޭމެއް ބަޔަކު ހިންގަމުންދާ އެކަމަށް ސަމާލުވާން އެދިއްޖެ އެވެ.
ސޯޝަލްމީޑިއާގައި ގާސިމް އިބްރާހީމް ކުރެއްވި ޕޯސްޓެއްގައި ވިދާޅުވީ އޭނާގެ ފޮޓޯއާއި، ވީޑިއޯ ބޭނުންކޮށްގެން، އާޓިފިޝަލް އިންޓެލިޖެންސްގެ އެހީގައި ތައްޔާރުކޮށްފައިވާ ވީޑިއޯ އަކީ އަސްލެއް ނެތް އެއްޗެއް ކަމަށެވެ.
"އަޅުގަނޑުގެ ނަމުގައި ފަތުރަމުންދާ އޯޑިއޯ ވީޑިއޯ ކްލިޕްތަކަކީ ރައްޔިތުންގެ ތެރެއިން ބަޔަކަށް އޮޅުވާލާ، ޒަމާނީ ކޮށް ސްކޭމް ކުރުމުގެ ބޭނުމުގައި ހިންގަމުންދާ އޮޅުވާލުމުގެ ދަށުދަރައިޖެ އަމަލުތަކެކެވެ،" ގާސިމް ވިދާޅުވި އެވެ.
ގާސިމް ވަނީ މިފަދަ އެއްވެސް ބާވަތެއްގެ ސްކޭމެއްގައި، އެއްވެސް ރައްޔިތަކު ނުޖެހުމަށް އިލްތިމާސް ކުރައްވާފަ އެވެ. އަދި އާޓިފިޝަލް އިންޓެލިޖެންސް މެދުވެރިކޮށް ތައްޔާރުކޮށްފައި ހުންނަ ހަގީގަތެއް ނެތް ވީޑިއޯ ކްލިޕް ފަދަ ތަކެތި ސޯޝަލް މީޑިއާގެ އެކި މަންސަތަކާއި، އެކި ވައިބާ ގްރޫޕްތަކާއި، ވަޓްސްއެޕް ގްރޫޕްތަކުގައި ހިއްސާ ނުކުރުމަށްވެސް ގާސިމް އެދިވަޑައިގެންނެވި އެވެ.
މިފަދަ ބައެއް ވީޑިއޯ ތަކަކީ ހަގީގަތެއް ކަމަށް ހީކޮށް ބައެއް ފަރާތްތަކުން އެއީ ތެދުތޯ ބަލާލަން އަޅުގަނޑަށް ވސް ބައެއް ފަހަރު އެފަދަ ކްލިޕްތައް ފޮނުވަމުންދާތީ ލޮބުވެތި އެންމެހާ ރައްޔިތުންގެ މަޢުލޫމާތަށްޓަކައި، ކަމުގެ ހަގީގަތް ހާމަކުރުމުގެ ބޭނުމުގައި މި މައުލޫމާތު ހިއްސާކޮށްލީމެވެ،" ގާސިމް ޕޯސްޓްގައި ވެއެވެ.
ސޯޝަލްމީޑިއާގައި ދައުރުކުރަމުންދާ ގާސިމްގެ އޭއައި ވީޑިއޯ އަކީ މީގެކުރިން ގާސިމް ޓީވީ ޗެނަލަކަށް ދެއްވި އިންޓަވިއެއް ބަދަލުކޮށްގެން ހަދާފައިވާ ވީޑިއޯ އެކެވެ.
އޭއައި ބޭނުންކޮށްގެން އަސްލާ ގާތްކުރާ ގޮތަކަށް ވީޑިއޯ ހަދައި ސޯޝަލްމީޑިއާގައި ދައުރުކުރުން ވަނީ މުޅި ދުނިޔޭގައިވެސް ބޮޑުވެފައި އޮތް މައްސަލަ އެކެވެ.