ތ. ގުރައިދޫ ޕޮލިސް ސްޓޭޝަންގައި މަސައްކަތް ކުރަމުން ދިޔަ އަންހެން ފުލުހެއް ކުއްލި ގޮތަކަށް ނިޔާވެއްޖެ އެވެ.
ރޭ ދަންވަރުގެ ވަގުތެއްގައި ނިޔާވީ ތ. ގުރައިދޫ، ތެމާ، ސާޖަންޓް ފާތިމަތު ރިފާ (37 އަހަރު) އެވެ.
ގުރައިދޫ ކައުންސިލަރަކު ނަން ނުޖެހުމަށް ޝަރުތުކޮށް އަވަސްއަށް މައުލޫމާތު ދެއްވަމުން ވިދާޅުވީ ރިފާ ނިޔާވީ ރޭ 12:00 ޖެހުމާއެކު ޑިއުޓީ ނިންމާފައި ގެއަށް ދިޔަ ތަނާ ކަމަށެވެ.
"ރިފާ ގެއަށް ހަމަ ވަންތަނާ ސޯފާއަކަށް ކުއްލިއަކަށް ވެއްޓުނީ ކަމަށް ވަނީ. އެ މަންޒަރު ފެނުނީ އޭނާގެ ދައްތައަކަށް،" ކައުންސިލަރު ވިދާޅުވި އެވެ.
އޭނާ ވިދާޅުވީ ރަށު ހޮސްޕިޓަލަށް ރިފާ ގެންދިޔައިރު ނިޔާވެފައިވާ ކަމަށްވެސް އަދި އޭނާ ނިޔާވީ ހޮސްޕިޓަލަށް ގެންދިޔަތާ ކުޑައިރުކޮޅެއް ފަހުން ކަމަށްވެސް ބުނާ ކަމަށެވެ.
ކައުންސިލަރު ވިދާޅުވި ގޮތުގައި ރިފާ އަކީ އެއްވެސް ބައްޔަކަށް ފަރުވާ ކުރަމުން ދިޔަ މީހެއް ނޫނެވެ. އެކަމަކު އިއްޔެ ކުޑަކޮށް ބަލިކޮށް އުޅޭތީ ރަށު ހޮސްޕިޓަލަށް އިއްޔެގެ ވަގުތެއްގައި ދެއްކި ކަމަށް ބައެއް މީހުން ބުނާ ކަމަށްވެސް ވިދާޅުވި އެވެ.
ގުރައިދޫ އިން އަވަސްއާ ވާހަކަ ދެއްކި މީހަކު ބުނީ ރިފާ އެ ރަށު ޕޮލިސް ސްޓޭޝަންގައި މަސައްކަތް ކުރާތާ އަށެއް ނުވަތަ 10 އަހަރު ވެދާނެ ކަމަށެވެ.
"ހަގީގަތުގައި ރިފާއަކީ ވަރަށް އަހްލާގު ރަނގަޅު އަދި އެންމެންނާ ވެސް ގުޅޭ ނައިސް މީހެއް،" އޭނާ ވިދާޅުވި އެވެ.
ރިފާ ކުއްލި ގޮތަކަށް ނިޔާވުމާ ގުޅިގެން މުޅި ރަށަށް "ޝޮކެއް" ލިބިފައިވާ ކަމަށްވެސް އަވަސްއާ ވާހަކަ ދެއްކި މީހުން ބުނެފައިވެ އެވެ.
ރިފާ ނިޔާވުމާ ގުޅިގެން ކޮމިޝަނާ އޮފް ޕޮލިސް އަލީ ޝުޖާއު ވަނީ އާއިލާއަށް ތައުޒިޔާ ދަންނަވާފަ އެވެ.
ރިފާ ނިޔާވިއިރު ފިރިއަކާއި އެއް ކުއްޖަކު ދުނިޔޭގައި އެބަހުއްޓެވެ.
ރިފާގެ ޖަނާޒާ ބޭއްވުމަށް ހަމަޖެހިފައިވަނީ މިއަދު މެންދުރު ނަމާދަށްފަހު ގުރައިދޫގައެވެ.