އުރީދޫ މޯލްޑިވްސް އިން މިއަދު ހުޅުމާލޭގައި ބޭއްވި ފަން ރަންއަށް ބޮޑު ތަރުހީބެއް ލިބިއްޖެ އެވެ.
ހުޅުމާލޭ ސެންޓްރަލް ޕާކުން ފެށި މި ދުވުން އިފްތިތާހުކޮށް ދެއްވީ ނައިބުރައީސް ހުސައިން މުހައްމަދު ލަތީފު އެވެ.
މި ދުވުމުގައި އުރީދޫ މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު ހާލިދްއަލް ހަމާދީ އާއި އެ ކުންފުނީގެ އިސްވެރިންވެސް ބައިވެރިވި އެވެ.
އުފާވެރި އަދި މަޖާ ހަރަކާތްތަކަކާއެކު ކުރިއަށް ގެންދިޔަ މި ދުވުމުގައި 6،000 މީހުން ބައިވެރިވި އެވެ.
މި ހަރަކާތުގައި އުރީދޫ ފަން ރަންގެ އެޑިޝަނެއް ފުވައްމުލައް ސިޓީގައި ބާއްވާނެކަން ވަނީ އިއުލާނުކޮށްފަ އެވެ.
އުރީދޫ ފަން ރަންއަކީ ރާއްޖޭގައި ބާއްވާ އެންމެ ބޮޑު އަދި އެންމެ އުފާވެރި ދުވުމެވެ. މިއީ ކުޑަކުދިންވެސް ބައިވެރިވެވޭ ގޮތަށް ބާއްވާ ދުވުމެކެވެ.
މިއީ ވަކި ވަގުތަކަށް ނިންމަންޖެހޭ ދުވުމަކަށް ނުވާތީ އަލަށް ދުވާ މީހުންނަށްވެސް މި ދުވުމުގައި ބައިވެރިވެވޭނެ އެވެ.
ޖުމްލަ ފަސް ކިލޯ މީޓަރުގެ މި ދުވުމުގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާނެ އެވެ.
އުރީދޫ ފަން ރަންގެ އެޑިޝަނެއް މި އަހަރު ޖުލައި މަހު ވަނީ ލ. އަތޮޅުގައިވެސް ބާއްވާފަ އެވެ. އެ ދުވުމަށްވެސް ވަރަށް ބޮޑު ތަރުހީބެއް ލިބުނެވެ.