ދުނިޔޭގެ އެންމެ މުއްސަނދި މީހާ އެލޮން މަސްކް، އެމެރިކާގެ ސަރުކާރުގެ ސައިޒު ކުޑަކުރުމަށް ކުރެވުނު މަސައްކަތުގައި އިސްކޮށް ހަރަކާތްތެރިވުމަށްފަހު، ޓްރަމްޕްގެ ސަރުކާރު ދޫކޮށްލައްވައިފި އެވެ.
މި މަސައްކަތުގެ ތެރެއިން އެމެރިކާ ސަރުކާރުގެ އެތައް ހާސް ވަޒީފާތައް އުވާލި އެވެ.
މަސްކްގެ ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި މަސްކް ވަނީ ސަރުކާރުގެ ހަރުދަނާކަން އިތުރުކުރުމުގެ ޑިޕާޓްމަންޓް ނުވަތަ ޑޯޖް ހިންގުމުގައި އެހީތެރިވުމުގެ ފުރުސަތު ދެއްވި ކަމަށްޓަކައި ޓްރަމްޕަށް ޝުކުރު އަދާކުރައްވާފަ އެވެ.
ބީބީސީ އިން ހާމަކޮށްފައިވާ ގޮތުގައި ބުދަ ދުވަހުގެ ރޭ ވައިޓް ހައުސްއިން ވަނީ މަސްކް "އޮފްބޯޑް" ކުރަން ފަށާފަ އެވެ. އޭނާގެ މަގާމަކީ ވަގުތީ މަގާމެއް ކަމުން މަސްކުގެ ވަކިވުމަކީ ހައިރާންވާންޖެހޭ ވަރުގެ ކަމެއް ނޫނެވެ. ނަމަވެސް މި ވަކިވުން އައިސްފައިވަނީ ޓްރަމްޕްގެ އެޖެންޑާގެ މައިގަނޑު ގާނޫނީ ބިންގަލަށް މަސްކް ފާޑުކިޔުމަށްފަހު އެއް ދުވަސް ފަހުންނެވެ.
"ހާއްސަ ސަރުކާރު މުވައްޒަފެއްގެ ގޮތުގައި އަހަންނަށް ކަނޑައެޅިފައިވާ މުއްދަތު ނިމުމަކަށް އަންނަމުން ދާއިރު، އިސްރާފު ކުޑަކުރުމުގެ ފުރުސަތު ދެއްވި ކަމަށްޓަކައި ރައީސް ޑޮނަލްޑް ޓްރަމްޕަށް ޝުކުރު އަދާކުރަން ބޭނުން،" މަސްކް އެކްސްގައި ލިޔުއްވި އެވެ.
"ޑޯޖްގެ މިޝަން ވާނީ ސަރުކާރުގެ ހުރިހާ ދާއިރާއެއްގައި ދިރިއުޅުމުގެ ބައެއްގެ ގޮތުގައި ހިމެނިގެންދާނެ އެއްޗަކަށް. އަދި މި މިޝަން ވަގުތު އިތުރަށް ވަރުގަދަވެގެންދާނެ،" މަސްކް ވިދާޅުވި އެވެ.
ޓްރަމްޕްގެ ކެބިނެޓް ފެންވަރުގެ ބައެއް އޮފިޝަލުންނާ އަމިއްލަ ގޮތުން ހިޔާލު ތަފާތުވެފައިވާ މަސްކް، ފުރަތަމަ ވަޢުދުވެވަޑައިގެންނެވީ ފެޑެރަލް ސަރުކާރުގެ ބަޖެޓުން މަދުވެގެން ދެ ޓްރިލިއަން ޑޮލަރު ކަނޑާލުމަށެވެ. ނަމަވެސް ފަހުން މި އަދަދު ދެބައިކުޅައެއްބަޔަށް ކުޑަކުރެއްވި އެވެ. އަދި އެންމެ ފަހުން މި އަދަދު 150 ބިލިއަން ޑޮލަރަށް ކުޑަކުރެއްވި އެވެ.
މަސްކްގެ މި ވަކިވުމާއެކު، އެމެރިކާގެ ސަރުކާރު ހަރުދަނާކުރުމަށް ކުރެވުނު މަސައްކަތްތަކުގެ ކުރިމަގާ މެދު ސުވާލު އުފެދިފައިވެ އެވެ. ނަމަވެސް މަސްކް ވިދާޅުވެފައިވާ ގޮތުގައި ޑޯޖްގެ މިޝަން ކުރިއަށް ދާނެ އެވެ. އަދި މި މަސައްކަތް ސަރުކާރުގެ ހުރިހާ ދާއިރާއެއްގައި ދިރިއުޅުމުގެ ބައެއްގެ ގޮތުގައި ހިމެނިގެންދާނެ ކަމަށް އޭނާ އުންމީދުކުރައްވަ އެވެ.