ޔުރޭނިއަމް މުއްސަނދިކުރަން ކުޑަވެސް ފުރުސަތެއް އޮންނަ ގޮތަށް އީޜާނާ އެކު ނިއުކްލިއާ އެއްބަސްވުމެއް އެމެރިކާއިން ނުހަދާނެ ކަމަށް އެ ގައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓުރުތު ސޯޝަލްގައި މެސެޖުކުރައްވައި ޓްރަމްޕް ވިދާޅުވި ގޮތުން އެމެރިކާއަށް އޮޅިގެންވެސް އީރާން ނިއުކްލިއާ ބާރަކަށް ވާން ތަން ނުދޭނެ އެވެ. އެއްބަސްވުންތަކަކީ އޮޓަމެޓިކުން ސޮއިކުރެވޭ ލިޔުންތަކަކަށް ހެދޭނެ އެއްވެސް ފުރުސަތެއް ނޯންނާނެ ކަމަށްވެސް އޭނާ ވިދާޅުވި އެވެ.
ޓްރަމް މި މޭރުވުމުން ވާހަކަދެއްކެވި ސަބަބަކީ، އީރާން ނިއުކްލިއާ އެއްބަސްވުމާ ބެހޭ ގޮތުން މީޑިއާތަކުން ދެއްކި ވާހަކަތަކެކެވެ. ބައެއް މީޑިއާތަކުން ވަނީ އީރާނަށް ވަކި ވަރަކަށް ޔޫރޭނިއަމް ފައްކާކުރެވޭ ގޮތަށް އެމެރިކާ އެއްބަސްވާނެ ކަމަށް ބުނެފަ އެވެ.
އެއީ މަދު އަދަދެއް ނަމަ އަދި މަދަނީ ބޭނުންތަކަށް ޔޫރޭނިއަމް މުއްސަނދިކުރުން އެމެރިކާއިން މައްސަލައަކަށް ނުހަދާނެ ކަމަށްވެސް ބައެއް މީޑިއާތަކުން ވަނީ ބުނެ ވާހަކަދައްކާފަ އެވެ.
ޓްރަމްޕް ވިދާޅުވި ގޮތުން އީޜާންއާ އެކު އެއްބަސްވުމެއް ހެދުމުގެ ބޭނުމަކީވެސް، ޔޫރޭނިއަމް މުއްސަދިކުރަން އެ ގައުމުން ކުރާ މަސައްކަތްތައް ހުއްޓުވުމެވެ. އަދި ނިއުކްލިއާ ދިރާސާތައް ހުއްޓުވައި، އަސްކަރީ ދަރަޖައަށް އުފެއްދުންތައް ތަރައްގީކުރަން ކުރާ މަސައްކަތްތައް ވެސް ހުއްޓުވުމެވެ
އެމެރިކާ އެދޭ ގޮތަށް ނަމަ، އީރާންގައި މިހާރު ހުރި ނިއުކްލިއާ މަރުކަޒުތަކުގެ އިތުރު އެއްވެސް މަރުކަޒެއް ބިނާނުކޮށްގެން ނުވާނެ އެވެ.
އީރާންއާ އެކު ނިއުކްލިއާ އެއްބަސްވުމެއް ހެދުމަށް އެމެރިކާ ކުރާ މަސައްކަތްތަކުގައި ވަނީ މަޝްވަރާތަކެއް ކޮށްފަ އެވެ. އޮމާންގައި ފެށި މަޝްވަރާތައް އިޓަލީއަށް ދެމިގެން ގޮސް އެނބުރި އަނެއްކާވެސް ވަނީ އޮމާނަށް އައިސްފަ އެވެ.
ނަމަވެސް، ދެމެހެއްޓެނިވި އެއްބަސްވުމެއް އަދި ވަކިން ޚާއްސަކޮށް އެމެރިކާ އެދޭ ގޮތަށް އީރާނާ އެކު އެއްބަސްވުމެއް އަދިވެސް އޮތީ ނުހެދި އެވެ.