މަސްތުވާތަކެތި ޓްރެފިކް ކުރަން ގެންގުޅޭ ޓަނެލްއެއް އެމެރިކާއާއި މެކްސިކޯގެ ބޯޑަރު ދަށުން ފެނިއްޖެއެވެ. މި ޓަނެލް ހޯދައިފަނީ އެމެރިކާގެ ފެޑެރަލް އޭޖެންޓްސް ކަމަށް އެމެރިކާގެ އެޓާނީ ޖެނެރަލްގެ އޮފީހުން ވަނީ ހާމަކޮށްފައެވެ.
މަސްތުވާތަކެތި ޓްރެފިކް ކުރަން ބޭނުން ކުރާ ޓަނެލް 700 މީޓަރަށް ވުރެ ދިގެވެ. އަދި މި ޓަނެލް ތެރެއިން ދެ ޓަނުގެ ކޮކެއިން ކިޔާ މަސްތުވާތަކެއްޗެއް ހުއްޓެވެ. ކޮކެއިންގެ އިތުރުން ހަތް ޓަނުގެ މެރުއާނާވެސް ހުރިކަމަށް ވެއެވެ. އެއީ ގާތްގަނޑަކަށް 22 މިލިޔަން ޑޮލަރުގެ މަސްތުވާތަކެއްޗެވެ. ފެޑެރަލް އޭޖެންޓުން ތުހުމަތު ކުރާގޮތުގައި މިއީ އެމެރިކާއާއި މެކްސިކޯއަށް މަސްތުވާތަކެތި ފޯރުކޮށްދޭން ބޭނުން ކުރާ އެންމެ ބޮޑު އެއް ޓަނެލްއެވެ.
700 މީޓަރުގެ މި ޓަނެލް ފައްޓަނީ މެކްސިކޯގެ ޓިއުއާނާގައި ހުރި ގެޔެއްގެ އަޑިންނެވެ. މި ޓަނެލް ބޯޑަރުން ދަށުންލާފައި ގޮސް ނިމެނީ އެމެރިކާގެ ސެންޑިއޭގޯގެ ސަރަހައްދަކަށެވެ.
މި ޓަނެލްގައި ވަނީ ވެންޓިލޭޝަން ސިސްޓަމްއެއް ގާއިމުކޮށް ލައިޓުތައްވެސް ހަރުކޮށްފައެވެ. އަދި މީގެ އިތުރުން ޓަނެލް ފެއްޓޭ ސަރަހައްދުގައި ލިފްޓެއް ހަރުކޮށް، ޓިއުއާނާގައި ހުރި ގޭގެ ކަބަޑަކުން ވަދެވޭ ގޮތް ހަދާފައެވެ.
މި ޓަނެލް ހޯދައި، ތަހްގީގުތަކަކަށް ފަހު، އެމެރިކާގެ ސޭންޑިއޭގޯއިން ވަނީ ހަ ފިރިހެނަކު ހައްޔަރު ކޮށްފައެވެ. ނަމަވެސް އޮފިޝަލުން، ހައްޔަރު ކުރި މީހުންގެ އެއްވެސް މައުލޫމާތެއް ހާމަކޮށްފައެއް ނުވެއެވެ.
