ދެވަނަ ހާފުގައި ޒުވާން ފޯވަޑް ހެރީ ކޭން ޖެހި ދެ ލަނޑާއެކު އިނގިރޭސި ލީގުގައި މިރޭ އާސެނަލް އަތުން 2-1 އިން އަމިއްލަ ދަނޑުގައި ޓޮޓެންހަމް ހޮޓްސްޕާ މޮޅުވެެއްޖެ އެވެ.
ލަންޑަނަށް ނިސްބަތްވާ ވާދަވެރި ދެ ޓީމުގެ ކުރިމަތިލުމުގެ ފުރަތަމަ ހާފުގައި އާސެނަލް އިން ލީޑު ނެގީ 11 ވަނަ މިނިޓުގައި ޖަރުމަންގެ މިޑްްފީލްޑަރު މެސުތު އޮޒިލް ޖެހި ލަނޑުންނެވެ.
އެކަމަކު މެޗުގެ 56 ވަނަ މިނިޓުގައި ޕެނަލްޓީ އޭރިޔާ ތެރެއިން ލިބުނު ބޯޅަ ގޯލުގެ ތެރެއަށް ވައްދާލައި، ކޭން ވަނީ ޓޮޓެންހަމް އަށް މެޗުގެ ނަތީޖާ އެއްވަރުކޮށްދީފަ އެވެ.
ޓޮޓެންހަމް މެޗުން މޮޅުވި ލަނޑު ކޭން ޖެހީ މެޗުގެ 86 ވަނަ މިނިޓުގަ އެވެ. ނަބިލް ބެންތަލެބް އާސެނަލްގެ ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ ކޭން ގޯލަށް އަމާޒުކޮށްލީ ބޮލުންނެވެ. މިއީ މި ސީޒަންގައި ކޭން ޖެހި 22 ވަނަ ލަނޑެވެ.
މި މެޗުން މޮޅުވެ ޓޮޓެންހަމް ވަނީ އާސެނަލް އާއި ސައުތުހެމްޓަން ފަހަތަށް ޖައްސާލައި، ތާވަލްގެ ހަތަރު ވަނަ އަށް ޖެހިލައިފަ އެވެ.