އިނގިރޭސި ޕްރިމިއާ ލީގުގައި މިރޭ އެސްޓަން ވިލާ އަތުން 2-1 އިން މޮޅުވެ، ތާވަލްގެ އެއްވަނައިގައި އޮތް ޗެލްސީ ލީޑު ފުޅާކޮށްފި އެވެ. މި މެޗުން މޮޅުވުމުން ޗެލްސީގެ ލީޑު ފުޅާވީ ލީގުގައި މިރޭ ހަލް ސިޓީ އާއި ތާވަލްގެ ދެވަނައިގައި އޮތް މެންޗެސްޓާ ސިޓީ ކުޅުނު މެޗު 1-1 އިން އެއްވަރުވުމުންނެވެ.
ވިލާގެ ދަނޑުގައި ކުޅުނު މެޗުގެ ފުރަތަމަ ހާފުގައި ޗެލްސީން ލީޑު ނެގީ އެޑިން ހަޒާޑް ޖެހި ލަނޑުންނެވެ. އެކަމަކު ދެވަނަ ހާފުގެ ކުރީކޮޅު ވިލާ އިން ނަތީޖާ އެއްވަރުކުރީ ޖޯރެސް އޮކޯރޭ ޖެހި ލަނޑުންނެވެ.
ޗެލްސީ މޮޅުވި ލަނޑު މެޗުގެ 66 ވަނަ މިނިޓުގައި ޖެހީ ސާބިއާގެ ޑިފެންޑަރު ބްރަނިސްލާވް އިވަނޮވިޗެވެ.
މި މެޗުން މޮޅުވެ ޗެލްސީ އަށް ވަނީ ތާވަލްގެ ދެވަނައިގައި އޮތް ސިޓީގެ މައްޗަށް ހަތް ޕޮއިންޓްގެ ލީޑެއް ލިބިފަ އެވެ ޗެލްސީ 59 ޕޮއިންޓާއެކު އޮތްއިރު، ދެވަނައިގައި ސިޓީ އޮތީ 49 ޕޮއިންޓާއެކު އެވެ.
އަމިއްލަ ދަނޑުގައި ހަލް ސިޓީ އަތުން ބަލިނުވެ ސިޓީ ސަލާމަތްވީ މެޗުގެ އިތުރު ވަގުތުގައި ޖޭމްސް މިލްނާ ޖެހި ލަނޑުންނެވެ. މެޗުގެ ފުރަތަމަ ހާފުގައި ހަލް އިން ލީޑު ނެގީ ޑޭވިޑް މޭލާ ޖެހި ލަނޑުންނެވެ.
އިނގިރޭސި ލީގުގައި މިރޭ ކުޅުނު މެޗުތަކުގެ ނަތީޖާ:
ޓޮޓެންހަމް 2 - 1 އާސެނަލް
އެސްޓަން ވިލާ 1 - 2 ޗެލްސީ
ލެސްޓާ ސިޓީ 0 - 1 ކްރިސްޓަލް ޕެލެސް
ކިއުޕީއާރް 0 - 1 ސައުތުހެމްޓަން
ސްވަންސީ 1 - 1 ސަންޑަލޭންޑް