ޖަރުމަން ލީގުގައި ރޭ ފްރައިބާގް އަތުން ރަށުން ބޭރުގައި 3-0 އިން މޮޅުވެ، ބޮރޫޝިއާ ޑޯޓްމަންޑް ހިތްހަމަޖެހުމެއް ހޯދައިފި އެވެ.
ޑިސެމްބަރު މަހުގެ ފަހުން ޑޯޓްމަންޑް ފުރަތަމަ ފަހަރަށް ލީގު މެޗަކުން މޮޅުވީ މެޗުގެ ކުރީކޮޅު ޖަރުމަންގެ ފޯވަޑް މާކޯ ރޮއިސް ޖެހި ލަނޑާއި ދެވަނަ ހާފުގައި ގެބޯންގެ ފޯވަޑް ޕިއޭ އެމްރިކް އަބުމެޔަންގް ޖެހި ދެ ލަނޑުންނެވެ.
މި ނަތީޖާއާއެކު، މި މެޗުގެ ކުރިން ތާވަލްގެ ފުލުގައި އޮތް ޑޯޓްމަންޑް ވަނީ ތާވަލްގެ 16 ވަނަ އަށް ޖެހިލައިފަ އެވެ.
"ކޮންފިޑެންސްއާއެކު ކުޅެލީމަ އަންނަ ތަފާތު މި މެޗުން ފެނިއްޖެ،" މެޗަށް ފަހު ޑޯޓްމަންޑްގެ ކޯޗު ޔާގަން ކްލޮޕް ބުންޏެވެ. "މި މެޗުގައި ޓީމުގެ ކުޅުން ވަރަށް ރަނގަޅު. އެކަމަކު އެއީ ހައިރާންވާންޖެހޭ ވަރުގެ ކަމެއް ނޫން. މި ޓީމުގެ ފެންވަރު އަހަންނަށް ވަރަށް ރަނގަޅަށް އެނގޭ."
މި މެޗުން ކުރިން ލީގުގައި ކުޅުނު މެޗުގައި އޮގްސްބާގް އަތުން ބަލިވުމުން ޑޯޓްމަންޑަށް އޮތީ ޕްރެޝަރު ބޮޑުވެފަ އެވެ. މިއީ މި 2011 ވަނަ އަހަރާއި 2012 ވަނަ އަހަރުގެ ލީގު ޗެމްޕިއަން ޑޯޓްމަންޑް މި ސީޒަންގައި ބަލިވި 11 ވަނަ މެޗެވެ. އަމިއްލަ ދަނޑުގައި ބަލިވުމުން ހިތްހަމަނުޖެހިފައި ތިބި ސަޕޯޓަރުން ހިތްހަމަޖައްސަން ޑޯޓްމަންޑްގެ ސީނިއާ ބައެއް ކުޅުންތެރިން ވަނީ އެ މެޗަށް ފަހު ސަޕޯޓަރުންނާ ވާހަކަދައްކައިފަ އެވެ. -- ބީީބީސީ