ޕެނަލްޓީ ޝޫޓްއައުޓްގައި ގޯލްކީޕަރު ބޫބަކަރް ބެރީ ކާމިޔާބުުކުރި ޕެނަލްޓީއާއެކު، އެފްރިކާ ކަޕް އޮފް ނޭޝަންސްގެ ފައިނަލްގައި ރޭ ގާނާ އަތުން ޕެނަލްޓީ ޖަހައިގެން 9-8 އިން މޮޅުވެ، އައިވަރީ ކޯސްޓް މުބާރާތުގެ ތަށި އުފުއްލާލައިފި އެވެ.
އައިވަރީ ކޯސްޓް މެޗުން މޮޅުވި ޕެނަލްޓީ ކާމިޔާބުކުރުމުގެ ކުރިން، ބެރީ ވަނީ ގާނާގެ ގޯލްކީޕަރު ބްރިމާ ރައްޒާކް ފޮނުވާލި ޕެނަލްޓީ ދިފާއުކޮށްފަ އެވެ.
މިއީ 1992 ވަނަ އަހަރުގެ ފަހުން އައިވަރީ ކޯސްޓް އެފްރިކާ ކަޕް އޮފް ނޭޝަންސް ކާމިޔާބުކުރި ފުރަތަމަ ފަހަރެވެ.
އައިވަރީ ކޯސްޓް ވަނީ 2006 ވަނަ އަހަރާއި 2012 ވަނަ އަހަރު އެފްރިކާ ކަޕް އޮފް ނޭޝަންސްގެ ފައިނަލްގައި ބަލިވެފަ އެވެ. ދެހާސް ބާރަ ވަނަ އަހަރުގެ ފައިނަލްގައި ޒެމްބިއާ އަތުން އައިވަރީ ކޯސްޓް ބަލިވިއިރު، އޭރު ޒެމްބިއާގެ ކޯޗަކަށް ހުރީ މިހާރު އައިވަރީ ކޯސްޓްގެ ކޯޗަކަށް ހުރި ފްރާންސްގެ ހާވް ރެނާޑޭވެ. ރެނާޑާކީ ދެ ގައުމަކަށް އެފްރިކާގެ ތަށި ހޯދައިދިން ފުރަތަމަ ކޯޗެވެ.
މެޗުގެ ފުރިހަމަ ވަގުތާއި އިތުރު ވަގުތު ހަމަވިއިރު ދެ ޓީމު ލަނޑެއް ނުޖެހި އެއްވަރުވުމުން ކުރިއަށް ގެންދިޔަ ޕެނަލްޓީ ޝޫޓްއައުޓްގައި އައިވަރީ ކޯސްޓްގެ ފުރަތަމަ ދެ ޕެނަލްޓީ ނާކާމިޔާބުވުމުން، އެފްރިކާގެ ތައްޓަށް ގާނާ އިން ކުރަމުންދިޔަ 33 އަހަރުގެ އިންތިޒާރު ނިމުމަކަށް އަންނާނެ ކަމަށް ބެލެވުނެވެ. އެކަމަކު ގާނާގެ އަފިރިޔޭ އަކުއާ އާއި ފްރޭންކް އަޗެމްޕޮންގް ފޮނުވާލި ދެ ޕެނަލްޓީ ނާކާމިޔާބުވުމުން ދެ ޓީމު އަނެއްކާ ވެސް އެއްވަރުވި އެވެ.
"ކްލަބާއެކު ކާމިޔާބު ހޯދުމަކީ ވަރަށް ބޮޑު އުފަލެއް. އެކަމަކު ގައުމަށް ކާމިޔާބު ހޯދައިދިނުމުން ކުރެވެނީ މާ ތަފާތު އިހުސާސްތަކެއް،" މެޗަށް ފަހު އައިވަރީ ކޯސްޓްގެ ކެޕްޓަން ޔާޔާ ޓޫރޭ ބުންޏެވެ. "މި ކާމިޔާބީގައި ކޯޗުގެ ދައުރު ވަރަށް ބޮޑު." -- ބީީސީސީ
