އިނގިރޭސި ޕްރިމިއާ ލީގުގައި ރޭ ވެސްޓް ހޭމްއާ ދެކޮޅަށް ކުޅުނު މެޗުގައި މެންޗެސްޓާ ޔުނައިޓެޑް އިން އިތުރު ވަގުތުގައި ޖެހި ލަނޑާއެކު 1-1 އިން މެޗު އެއްވަރުވިއިރު، މެޗުގައި ޔުނައިޓެޑްގެ ފަރާތުން ފެނުނު ކުޅުމަށް ވެސްޓް ހޭމްގެ ކޯޗު ސޭމް އެލަޑައިސް ފާޑުކިޔައިފި އެވެ.
މެޗުގެ ދެވަނަ ހާފުގެ ކުރީކޮޅު ޗެއިކޫ ކޮޔާޓޭ ޖެހި ލަނޑާއެކު ވެސްޓް ހޭމް މެޗުން މޮޅުވާން ދަނިކޮށް، ޔުނައިޓެޑް އިން އިތުރު ވަގުތުގައި ނަތީޖާ އެއްވަރުކުރީ ޑޭލީ ބްލިންޑް ޖެހި ލަނޑުންނެވެ.
މެޗަށް ފަހު އެލަޑައިސް ބުނީ ޔުނައިޓެޑް އަކީ "ބޮޑު ބޯޅަ" ޖަހައިގެން ކުޅޭ ޓީމެއް ކަމަށެވެ. އަދި ޔުނައިޓެޑް އިން ކުލުނު އެގޮތަށް ކުޅުމުން ވެސްޓް ހޭމް އަށް އުނދަގޫވި ކަމަށާއި މެޗު އެއްވަރުކޮށް، ޔުނައިޓެޑް އިން އެ ޓީމުގެ ރޭވުން ކާމިޔާބުކުރި ކަމަށެވެ.
"ޔުނައިޓެެޑް ކުޅެމުންދިޔަ ބޮޑު ބޯޅަތައް ނުހުއްޓުވިގެން ފަހު ވަގުތު މެޗު އެއްވަރުވީ. ފަހުން ޔުނައިޓެޑް އިން ބޮޑު ބޯޅަތައް ކުރިއަށް ލައިގެން، ގޮތެއް ވޭތޯ ބެލީ. އެކަން އެ ޓީމުން ކާމިޔާބުކުރި،" އެލަޑައިސް ބުންޏެވެ.
މެޗަށް ފަހު ޔުނައިޓެޑްގެ ކޯޗު ލުއީ ވެން ހާލް ބުނީ "ބޮޑު ބޯޅަ" ޖަހައިގެން ކުޅެން ޖެހުނީ މަޖުބޫރުވެެގެން ކަމަށެވެ.
"ޕޮއިންޓަކާއެކު އަހަރެން ހިތްހަމައެއް ނުޖެހޭ. ފުރަތަމަ ހާފުގައި ނުކުޅެވުމުން އަހަރެމެން ތިބީ ހިތްހަމަނުޖެހިފައި. އެހެންވެ ދެވަނަ ހާފުގައި ކުޅުން ބަދަލުވީ،" ވެން ހާލް ބުންޏެވެ. -- ބީބީސީ