ލިވަޕޫލް އަށް ކުޅެމުންދާ އިންގްލެންޑްގެ ޒުވާން ފޯވަޑް ރަހީމް ސްޓާލިން އަށް ލިވަޕޫލުން އާ ކޮންޓުރެކްޓެއް ހުށަހަޅާފައިވާ ކަމަށާއި އެ ކޮންޓުރެކްޓަކީ ސްޓާލިން ކަހަލަ ޒުވާން ކުޅުންތެރިއަކަށް ވަރަށް ރަނގަޅު ކޮންޓުރެކްޓެއް ކަމަށް އެ ޓީމުގެ ކޯޗު ބްރެންޑަން ރޮޖާސް ބުނެފި އެވެ.
ސްޓާލިން ލިވަޕޫލްއާއެކު މިހާރު ހަދާފައިވާ ކޮންޓުރެކްޓް ހަމަވާނީ 2017 ވަނަ އަހަރެވެ. އެކަމަކު ސްޓާލިންގެ ކޮންޓުރެކްޓް އާކުރަން ލިވަޕޫލުން މަސައްކަތްކުރަމުންދާތާ ދުވަސްތަކެއްވެއްޖެ އެވެ.
ލިވަޕޫލްގެ ކޯޗު ރޮޖާސް ބުނީ ސްޓާލިން އަށް ހުށަހެޅި އާ ކޮންޓުރެކްޓަކީ ސްޓާލިން ކަހަލަ ޒުވާން ކުޅުންތެރިއަކަށް "ވަރަށް ރަނގަޅު" ކޮންޓުރެކްޓެއް ކަމަށެވެ. އެކަމަކު ޒުވާން އުމުރުގައި ސްޓާލިން އަށް އެކަށީގެންވާ އަދަދަށްވުރެ ގިނަ ފައިސާ މި ކޮންޓުރެކްޓެއްގެ ދަށުން ނުލިބޭނެ ކަމަށް ރޮޖާސް ބުންޏެވެ.
"ޒުވާން އުމުރުގައި ކުޅުންތެރިއަކަށް އެކަށީގެންވާ ވަރަށްވުރެ ބޮޑު މުސާރައެއް ދީފި ނަމަ އެ ކުޅުންތެރިއާގެ ޑިވެލޮޕްމަންޓަށް ހުރަސްއެޅޭނެ. އެކަމަކު ޒުވާން ކުޅުންތެރިންނަށް އެބަޖެހޭ ހިތްވަރު ދޭން ވެސް ޖެހޭ. އެ ކުޅުންތެރިންނަށް މަގު ދައްކައިދޭން ޖެހޭ. އަހަރެން ގަބޫލްކުރާ ގޮތުގައި ލިވަޕޫލަކީ ސްޓާލިން އަށް އެންމެ ރަނގަޅު ކްލަބު،" ރޮޖާސް ބުންޏެވެ.
ސްޓާލިން އަށް ރެއާލް މެޑްރިޑާއި ޗެލްސީން ޝައުގުވެރިވާ ކަމަށް ރިޕޯޓްތަކުން ބުނެ އެވެ.
އެކަމަކު ރޮޖާސް ބުނީ ސްޓާލިން އެ ކްލަބުގައި ބަހައްޓަން، އެކަށީގެންވާ ވަރަށްވުރެ ބޮޑު ހޭދައެއް އެް ކްލަބުން ނުކުރާނެ ކަމަށެވެ.
"ކުޅުންތެރިއަކު ހިފަހައްޓަން، އެ ކުޅުންތެރިއެއްގެ އުމުރަށް ވުރެ އެކަށީގެންވާ ވަރަށްވުރެ ބޮޑު މުސާރައެއް ނުދޭނަން. މި ކްލަބުން ސްޓާލިން އަށް މި ދެނީ ރަނގަޅު ފުރުސަތެއް،" ރޮޖާސް ބުންޏެވެ. -- ބީބީސީ