ސްޕެއިން ލީގުގައި އެންމެ ފަހުން ކުޅުނު މެޗުގައި އެތުލެޓިކޯ މެޑްރިޑް އަތުން 4-0 އިން ރެއާލް މެޑްރިޑް ބަލިވި ނަމަވެސް، ރެއާލް އަށް ލީގު ކާމިޔާބުކުރެވޭނެ ކަމަށް ގަބޫލްކުރާ ކަމަށް ރެއާލްގެ ފޯވަޑް ކްރިސްޓިއާނޯ ރޮނާލްޑޯ ބުނެފި އެވެ.
އެތުލެޓިކޯ އަތުން ތަފާތު ބޮޑުކޮށް ބަލިިވި ނަމަވެސް، ރެއާލް އޮތީ ތާވަލްގެ އެއްވަނައިގަ އެވެ. ރެއާލަށް ވުރެ އެއް ޕޮއިންޓް ފަހަތުން ތާވަލްގެ ދެވަނައިގައި އޮތީ ބާސެލޯނާ އެވެ. ތިން ވަނައިގައި އޮތީ އެތުލެޓިކޯ އެވެ.
ރޮނާލްޑޯ ބުނީ ރެއާލް އަކީ އެތުލެޓިކޯ އަށްވުރެ ވަރުގަދަ ޓީމެއް ކަމަށާއި ރެއާލަށް ލީގު ކާމިޔާބުކުރެވޭނެ ކަމަށް ގަބޫލްކުރާ ކަމަށެވެ.
"އެތުލެޓިކޯ އަަށްވުރެ ވަރުގަދަ ޓީމެއް ރެއާލް އަކީ. އަހަރެމެން އެބަޖެހޭ ދަނޑުމަތީގައި އެކަން ސާބިތުކޮށްދޭން. އަހަރެން ގަބޫލްކުރާ ގޮތުގައި ލީގު ކާމިޔާބުކުރާނީ ރެއާލް،" ރޮނާލްޑޯ ބުންޏެވެ.
ރޮނާލްޑޯ ބުނީ އެ މެޗުގެ މަތިން ހަނދާން ނައްތާލައި، ލީގު ހޯދުމުގެ މަސައްކަތަށް ރެއާލްގެ ކުޅުންތެރިން މިހާރު ސަމާލުވާންޖެހޭ ކަމަށެވެ.
"މި ނަތީޖާގެ މަތިން ހަނދާން ނައްތާލަން އެބަޖެހޭ. ރެއާލް އަކީ ކޮންމެ ކޮންމެ ޓީމެއް އަތުން 4-0 އިން ބަލިވާނެ ޓީމެއް ނޫން،" ރޮނާލްޑޯ ބުންޏެވެ. -- ބީބީސީ