ހެންވޭރު، ނޫރު މިސްކިތް ކައިރީގައި މާރާމާރީ ހިންގ ރޭ ޒަހަމް ކޮށްލި މީހާގެ ހާލު މިހާރު ރަނގަޅުކަމަށް އޭޑީކޭ ހޮސްޕިޓަލުން ބުނެފި އެވެ. ރޭ ޒަހަމްކޮށްލާފައި ވަނީ 21 އަހަރުގެ ޒުވާނާކެވެ.
ރޭ ގާތްގަނޑަކަށް 10:00 ޖަހާ އެހާކަންހާއިރު ހިނގި އެ މާރާމާރީގައި އޭނާ ޒަހަމްކޮށްލާފައި ވަނީ ނޫރު މިސްކިތް ކައިރީ ގޯޅިއެއްގެ ތެރޭގަ އެވެ.
އޭޑީކޭގެ މެނޭޖިން ޑިރެކްޓަރު އަހުމަދު އައްފާލް މިއަދު ވިދާޅުވީ ރޭގެ މާރާމާރީގައި އެ ޒުވާނާއަށް ސީރިއަސް ޒަހަމްތަކެއް ލިބިފައިވި ނަމަވެސް އޭނާގެ ހާލު މިހާރު ރަނގަޅު ކަމަށެވެ. އަދި ވިދާޅުވީ ރޭ ވެސް އޭނާ އޮތީ ނުރައްކަލުން ބޭރުގައި ކަމަށާއި ފުރާނައަށް ގެއްލުންވާ ވަރުގެ އަނިޔާއެއް ހުރި ކަމަށް ޑޮކްޓަރުން ވިދާޅު ނުވާ ކަމަށެވެ.
އޭނާ އަދިވެސް އޮތީ އެ ހޮސްޕިޓލުގައި އެޑްމިޓް ކޮށްފަ އެވެ.
މާރާމާރީގެ މައްސަލަ ރިޕޯޓު ކުރާ މިންވަރު މި ދުވަސްކޮޅު އިތުރުވެފއިވާއިރު، ރޭގެ މާރާމާރީއާއި ގުޅިގެން ފުލުހުން ރޭ ވަނީ ތިން މީހަކު ހައްޔަރުކޮށްފަ އެވެ.
މީގެކުރިން މާރާމާރީއެއް ހިނގި ސަރަހައްދުގައި ލޭ އޮހޮރިފައި - އަވަސް/ ފައިލްފޮޓޯ