ރާއްޖޭގެ ފަރާތުން އދ އަށް ކަނޑައަޅާފައި ހުންނަ ދާއިމީ މަންދޫބުކަމަށާއި އެމެރިކާ އަދި ކެނެޑާއަށް ކަނޑައަޅާފައި ހުންނަ ސަފީރު ކަމަށް ފޮރިން ސެކެޓްރީ ޑރ. އަލީ ނަސީރު ބަދަލު ކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.
މިއަދު ބޭއްވި، ގައުމީ ސަލާމަތުގެ ކޮމިޓީގެ ބައްދަލުވުމުގައި އެޖެންޑާކޮށްފައި އޮތީ، މިހާރު ފޮރިން ސެކްރެޓަރީގެ މަގާމުގައި ހުންނެވި، ގދ. ގައްދޫ ބެންހާ، އަލީ ނަސީރު، އދ ގައި ހުންނަވާ ދާއިމީ މަންދޫބު ކަމަށާއި އެމެރިކާ އަދި ކެނެޑާއަށް ކަނޑައަޅާފައި ހުންނަ ނަން ރެސިޑެންސް ސަފީރު ކަމަށް ހަމަޖެއްސުމުގެ މައްސަލަ އެވެ. ބޭރު ގައުމަކަށް ސަފީރަކު ހަމަޖެއްސުމުގެ ކުރިން ރައްޔިތުންގެ މަޖިލީހަށް އެ މައްސަލަ ހުށަހަޅައި ރުހުން ހޯދަން ޖެހެ އެވެ.
އަލީ ނަސީރު އަދިވެސް ހުންނެވީ މިނިސްޓްރީގެ ފޮރިން ސެކެޓްރީއެއްގެ މަގާމުގަ އެވެ. އޭނާ އެ މަގާމޫން އަދި ވަކި ނުކުރާކަން ފޮރިން މިނިސްޓްރީ އިން ކަށަވަރުކޮށްދިނެވެ. އަލީ ނަސީރު އެ މަގާމަށް ހަމަޖެއްސީ 2013 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. އެހެން ނަމަވެސް އެމަގާމުތަކަށް އައްޔަން ކުރަން ރުހުން ލިބިއްޖެ ނަމަ، އަލީ ނަސީރު ފޮރިން ސެކްރެޓަރީ ކަމުން ވަކިވާނެ އެވެ.
މީގެ އިތުރުން ނެދަލޭންޑްސް އާއި ލަކްސަމްބާގަށް ރާއްޖެއިން ކަނޑައަޅާފައި ހުންނަ ސަފީރަކަށް ގ. ސަމަންތާ އަހުމަދު ޝިއާން އައްޔަންކުރުމާ ގުޅޭގޮތުން ބަހުސް ކުރުމަށް ވެސް މިއަދުގެ ކޮމިޓީގައި ވަނީ ބަހުސްކޮށްފަ އެވެ. ޝިއާން އަކީ ރާއްޖެއިން އީޔޫ އަށް ވެސް ކަނޑައަޅާފައި ހުންނަ ސަފީރެވެ.
