ޔޫރޯ ފުޓްބޯޅަ މުބާރާތުގައި މިހާތަނަށް އިނގިރޭސިން ކުޅުނު ތިން މެޗުގައި ވެސް ގޯލު ޖެހުމުގައި މައްސަލަތައް އުޅޭ ކަމަށާއި ކުރިއަށް ކުޅޭ ކުޅުންތެރިން ނަގަން އުނދަގޫވެފައިވާ ކަމަށް ކޯޗު ރޯއި ހޮޖްސަން ބުނެފި އެވެ.
އޭނާ މިހެން ބުނީ އިއްޔެ ރޭ ސްލޮވާކިޔާ އަތުން ލަނޑެއްް ނުޖެހި އެއްވަރުވި މެޗުގަ އެވެ. އިނގިރޭސި ޓީމަކީ މި ފަހަރު އެންމެ ގިނަ އަދަދަކަށް އެޓޭކިން ކުޅުންތެރިން ތިބި ޓީމެވެ. ފޯވަޑުންގެ ގޮތުގައި ވެސް ފަސް ފޯވަޑުން އެބަތިއްބެވެ.
އެއީ ޕްރެމިއާ ލީގުގެ ރަންބޫޓު ހޯދި ހެރީ ކޭން އާއި އެންމެ ގޯލަކުން އޭނާގެ ފަހަތަށް ދިޔަ ޖިމީ ވާޑީ އާއި އަރަމުން އަންނަ ޒުވާން ފޯވަޑް މާކަސް ރަޝްފޯޑާއި ގައުމީ ޓީމަށް އެންމެ ގިނަ ލަނޑު ޖަހާދީފައިވާ ފޯވަޑް ކެޕްޓަން ވޭން ރޫނީ އާއި ލިވަޕޫލަށް އެންމެ ގިނަ ލަނޑު ޖަހައިދިން ޑެނިއަލް ސްޓަރިޖެވެ.
މީގެ ތެރެއިން ހެރީކޭން ފުރަތަމަ ދެ މެޗުގައި ފުލްކޮށް ކުޅުނަސް ގޯލު ޖެހީ ދެ ވަނަ މެޗުގައި ބެންޗުން ނުކުމެ ސްޓަރިޖާއި ވާޑީ އެވެ. މުބާރާތުގައި މިހާތަނަށް އިންގްލޭންޑް ޖެހި ތިން ގޯލުގެ ތެރެއިން އަނެއް ގޯލު ޖެހީ މިޑްފީލްޑަރު އެރިކް ޑަޔާ އެވެ. އެކަަކު މުޅި މުބާރާތުގައި ވެސް އެންމެ ގިނަ ޗާންސް ހޯދީ އިންގްލޭންޑެވެ. މުޅިއެކު 65 ޗާންސް ލިބުނުއިރު އަރިމަތިން ކުޅޭ ރަހީމް ސްޓާލިން އާއި އާދަމް ލަލާނާ އަދި މެދުތެރެއަށް ކުޅޭ ރޫނީ އަށް ވެސް އަދި ގޯލެއް ނުޖެހެ އެވެ.
"އެންމެ ބޮޑު ކަންބޮޑުވުމަކީ އެއީ. ގޯލު ނުޖެހުން. ކުޅުންތެރިން ސެލްކެޓް ކުރަން އުނދަގޫވެއްޖެ މިހެންވީމަ. އަހަރުމެންގެ ކުޅުން ގޯހެއްނޫން. ފުރުސަތު ލިބޭ. ނިންމާނުލެވެނީ. ކުރިއަށް އޮތް މެޗަކީ ލަނޑު ނުޖަހައި ވާން އޮތް މެޗެއްނޫން. މިހާރު އަހަންނަށް އުނދަގޫ ސްޓަރައިކިން ފޯސް އަށް ނަގާނެ ކުޅުންތެރިން ކަނޑައަޅަން. މިއީ ވަރަށް ބޮޑު ބޮލުރިހުމެއް،" ކޯޗު ބުންޏެވެ.
"އަހަންނަށް ހީވަނީ ލަލާނާ އާއި ސްޓާލިން ވަރަށް ރަނގަޅަށް ކުޅުނުހެން ފުރަތަމަ މެޗުގައި. އެކަމަކު ދެ ވަނަ މެޗުގައި އަހަރުމެންނަށް ގޯލު ނުޖެހުމުން އަހަރެން ފުރުސަތުދިނީ ވާޑީ އާއި ސްޓަރިޖަށް. އެމީހުން ގޯލު ޖެހި. އެކަމަކު ދެން މިދިޔައީ ގޯލެއް ނުޖެހި. އެހެންވީމާ މިއީ ވަރަށް ބޮޑު ކަންބޮޑުވުމެއް،" ކޯޗު ބުންޏެވެ.