ސްޕޭނުގެ ރެއާލް މެޑްރިޑުން އެކުލަބަށް ކުޅޭ ވޭލްސްގެ މިޑްފީލްޑަރު ގެރެތް ބޭލް ދުނިޔޭގެ އެންމެ މުސާރަ ބޮޑު އެއް ކުޅުންތެރިޔާ އަށް ހަދަން ނިންމައިފި އެވެ.
ސްޕޭނުގެ ނޫސްތަކުން ބުނާ ގޮތުގައި ޔޫރޯ ފުޓްބޯޅަ މުބާރާތަށް ފަހު ބޭލް އެނބުރި ރެއާލް މެޑްރިޑާއެކު އާސީޒަން ފަށަން ދާނީ މުޅި އުމުރު އެ ޓީމުގައި ހުންނާށެވެ. އެއީ ހަތް އަހަރުގެ އާ ކޮންޓްރެކްޓަކާއެކު އޭނާ އަށް ދުނިޔޭގެ ފެންވަރުގެ މުސާރައެއްް ކަނޑައަޅާތީ އެވެ. އެއީ ގާތްގަނޑަކަށް ހަފުތާއަކު ތިންލައްކަ ޕައުންޑް ކަމަށްވެ އެވެ. މިއަދަދަށް މުސާރަބޮޑުކޮށްފިނަމަ އޭނާ ވެގެންދާނީ ކްރިސްޓިއާނޯ ރޮނާލްޑޯ އަށްވުރެ ވެސް މުސާރަ ބޮޑު ކުޅުންތެރިއެކެވެ. ރޮނާލްޑޯ އަށް މިހާރު ލިބެނީ ހަފުތާއަކު 288،000 ޕައުންޑެވެ. ބޭލް އަށް މިހާރު އޭނާ އަށް ލިބެނީ ހަފުތާއަކު 256،000 ޕައުންޑެވެ.
ސްޕޭނުގެ މީޑިޔާތަކުން ބުނަނީ ރެއާލް މެޑްރިޑުން މިގޮތަށް ނިންމީ މިފަހަރުގެ ޔޫރޯގައި 26 އަހަރުގެ ކުޅުންތެރިޔާ ދައްކަމުން އަންނަ މޮޅު ކުޅުމުގެ ސަބަބުންނެވެ. ވޭލްސް ކުޅުނު ތިން މެޗުގައި ވެސް ތިން ގޯލު ޖަހައިގެން މުބާރާތުގެ ރަންބޫޓު ހޯދުމުގެ ލިސްޓުގެ ކުރީގައި ވަނީ ވެސް އޭނާ އެވެ. އަދި އިނގިރޭސި ބޮޑެތި ބައެއް ކުލަބުތަކުން އޭނާ ގަތުމަށް މަސައްކަތް ކުރާ ކަމަށް ވެސް ސްޕޭނުގެ ނޫސްތަކުން ބުނެ އެވެ. އޭގެ ތެރޭގައި މެންޗެސްޓާ ޔުނައިޓެޑް ވެސް ހިމެނެ އެވެ.
ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި ރެއާލް މެޑްރިޑަށް ބޭލް ގަތީ މީގެ ތިން އަހަރު ކުރިން އިނގިރޭސިވިލާތުގެ ޓޮޓެންހަމުންނެވެ. އޭނާ ވަނީ ސްޕޭނުގައި ކުޅެގެން އެންމެ ގިނަ ގޯލު ޖެހި އިނގިރޭސި ކުޅުންތެރިޔާގެ ރެކޯޑް ވެސް މުގުރާލައިފަ އެވެ. އެއީ މިހާތަނަށް 76 މެޗުން 43 ގޯލު ޖަހައިގެންނެވެ. ސްޕޭނުގައި އެންމެ ގިނަ ގޯލު މިހާތަނަށް ޖަހާފައިވަނީ ގެރީ ލިނެކާ އެވެ. އޭނާ ވަނީ ބާސެލޯނާ އަށް 103 މެޗުން 42 ގޯލު ޖަހާފަ އެވެ.