ގަތަރުގައި 2022 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕް އެ އަހަރުގެ ނޮވެމްބަރު / ޑިސެމްބަރު މަހު ބޭއްވުމަށް ފީފާ އިން ނިންމާނެ ކަމަށް މީޑިއާ ރިޕޯޓްތަކުން ބުނެފި އެވެ.
ރިޕޯޓްތަކުން ބުނާ ގޮތުގައި ފީފާ ޓާސްކް ފޯސް އިން އަންނަ ހަފުތާގައި ބާއްވާ ބައްދަލުވުމުގައި ފިނި މޫސުމަށް 2022 ވަަނަ އަަހަރުގެ ވޯލްޑް ކަޕް ބަދަލުކުރުމަށް ހުށަހަޅާނެ އެވެ. އަދި މާޗު މަހު އޮންނަ ފީފާގެ އެގްޒެކުޓިވް ކޮމެޓީގެ ބައްދަލުވުމުގައި އެ ހުށަހެޅުމަށް ތާއީދުކޮށް، ފިނި މޫސުމުގައި ވޯލްޑް ކަޕް ބޭއްވުމަށް ފާސްކުރާނެ ކަމަށްވެ އެވެ.
ވޯލްޑް ކަޕް އާންމުކޮށް ބާއްވާ ޖޫން / ޖުލައި މަހުގެ ތެރޭގައި ގަތަރުގެ ފިނި ހޫނުމިން 50 ޑިގްރީ ސެލްސިއަސް އަށް އަރާއިރު، ގަތަރުގެ ހޫނު މޫސުމުގައި ވޯލްޑް ކަޕް ބޭއްވުމަކީ އެންމެ ރަނގަޅު ގޮތް ނޫން ކަމަށް ފީފާގެ ރައީސް ޖޯސެޕް ބްލެޓާ ވަނީ ދާދި ފަހުން ވިދާޅުވެފަ އެވެ.
ފިނި މޫސުމުގައި ވޯލްޑް ކަޕް ބާއްވައިފި ނަމަ، ޔޫރަޕްގެ ފުޓްބޯޅަ ސީޒަނަށް ބުރޫއަރާނެތީ، ޔޫރަޕްގެ ކްލަބް އެސޯސިއޭޝަނާއި އެސޯސިއޭޝަން އޮފް ޔޫރަޕިއަން ޕްރޮފެޝަނަލް ފުޓްބޯލް ލީގްސް އިން ވަނީ 2022 ވަނަ އަހަރުގެ ވޯލްޑް ކަޕް މޭ މަހު ނުވަތަ އޭޕްރީލް މަހު ބޭއްވުމަށް ހުށަހަޅައިފަ އެވެ. އެކަމަކު މި ހުށަހެޅުމަށް ފީފާ އިން ސަމާލުކަން ދޭނެ ކަމަށް ނުބެލެވެ އެވެ. -- އީއެސްޕީއެން