މާލޭ ޑީ ވޯޓަރިން ނިޒާމް ބިމު އަޑިން ގުޅައިލުމަށް މޯލްޑިވްސް ވޯޓާ އެންޑް ސުވަރޭޖް ކޮންޕެނީ (އެމްޑަބްލިއުއެސްސީ) އާ ހަވާލުކޮށްފި އެވެ. -- ޑީ ވޯޓަރިން ނިޒާމަކީ ކޮންސްޓްރަކްޝަން ސައިޓުތަކުން ފެން ހިނދުމަށް ބޭނުން ކުރާ ނިޒާމެކެވެ.-- މާލޭގައި މިހާރު ޑީވޯޓަރިން ކުރަނީ މަގުތައް މަތިން ހޮޅިއަޅައިގެނެވެ.
އެ ނިޒާމް ބަދަލުކުރުމަށް އެމްޑަބްލިއުއެސްސީއާއެކު އެއްބަސްވުމުގައި ސޮއި ކުރުމުގެ ރަސްމިއްޔާތުގައި ވާހަކަފުޅޔ ދައްކަވަމުން ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ މިހާރު ކޮންސްޓްރަކްޝަން ސައިޓުތަކުން ނެރޭ ޑީ ވޯޓާ ކުރާ ހޮޅި، ޕޭމަންޓު މަތިންނާއި މަގު ހުރަސްކޮށް އަޅަން މަޖުބޫރުވެފައިވާ ކަމަށާއި އޭގެ ސަބަބުން އާންމުންނަށް ދަތިތައް ކަރިމަތިވެފައިވާ ކަމަށެވެ.
އެމްޑަބްލިއުއެސްސީއާއެކު މިއަދު އެއްބަސްވީ އެ ނިޒާމް ބަދަލުކޮށް، ބިމު އަޑިން އީ ވޯޓަރިން ކުރެވޭނެ ނެޓްވޯކެއް ގުޅާލުމަށެވެ. އެކަން ކުރުމަށް މިހާރު ތަރައްގީ ކުރަމުން އަންނަ ސިނާއީ އަވަށުގައި ޕަންޕު ސްޓޭޝަނެއް ގާއިމް ކުރުމަށް ބިމެއް ހަވާލުކޮށްފައިވާ ކަމަށް މިނިސްޓަރު ވިދާޅުވި އެވެ.
"މާލޭގައި ކޮންސްޓްރަކްޝަން މަސައްކަތް ކުރިއަރަމުންދާއިރު އީ ވޯޓަރިން ވަރަށް ބޮޑަށް އިތުރުވެގެން ވެސް ދާނެ. މީގެ ސަބަބުން އެތަށް ބަޔަކަށް އުނދަގޫވާތީ މިއަދު މި ހަވާލު ކުރީ ބިމު އަޑިން އެ ނިޒާމް ގުޅާލަން. އެމްޑަބްލިއުއެސްސީއިން އެކަމަށް އެކަށޭނެ ވަރުގެ ނެޓްވޯކަކާއި ޕަންޕު ސްޓޭޝަންއެއް ގާއިމް ކުރެވިގެންދާނެ. އެ މަސައްކަތް އެމްޑަބްލިއުއެސްސީ އިން ކުރާނީ އެކުންފުނީގެ އަމިއްލަ ހަރަދުގައި ކަން ފާހަގަކޮށްލަން ޖެހޭ،" މުއިއްޒު ވިދާޅުވި އެވެ.
މި މަޝްރޫއާ ބެހޭ ގޮތުން އެމްޑަބްލިއުއެސްސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ ޑީ ވޯޓަރިން ނިޒާމްތައް މިހާރު އެޅިފައި ހުންނާނީ މާލޭގެ ނަރުދަމާއަށް ކަމަށާއި މި މަޝްރޫއުގެ ދަށުން ޑީ ވޯޓަރިންނާއި ސުވަރޭޖުގެ ނިޒާމްވެސް ވަރުގަދަ ކުރެވިގެންދާނެ ކަމަށެވެ.