ވޯލްޑް ކަޕް ކޮލިފައިންގައި ސްލޮވާކިޔާ އަތުން 1-0އިން އިނގިރޭސި ގައުމީ ފުޓްބޯޅަ ޓީމު ރޭ މޮޅުވެއްޖެ އެވެ.
މެޗުގެ ހަމައެކަނި ލަނޑު ޖެހީ އިތުރު ވަގުތުގެ ފަހު ސިކުންތުކޮޅުގައި އާދަމް ލަލާނާ އެވެ. އޭނާ މި ލަނޑު ޖެހިއިރު ފަހު ހާފު ފަށައިގެން 57 ވަނަ މިނިޓްގައި ކެޕްޓަން މާޓިން ސްކަޓެލް އަށް ދެއްކި ރަތްކާޑާއެކު ސްލޮވާކިޔާ ކުޅެމުންދިޔައީ އެކަކު މަދުކޮށެވެ.
މި މެޗުގައި ސްލޮވާކިޔާ ޓީމުން ގޯލަށް ފޮނުވާލީ އެންމެ ހަމަލާއެކެވެ. މުޅި މެޗު ކޮންޓްރޯލްކޮށްގެން އިނގިރޭސީން ކުޅެމުންދިޔަ ނަމަވެސް ޓީމުގެ ކްރިއޭޓިވިޓީ ފެންނަން ފެށީ ޑެލޭ އަލީ ކުޅެން ނުކުތުމުންނެވެ.
ފަހަތުން މެންޗެސްޓާ ސިޓީގެ ޖޯން ސްޓޯން ވަރަށް ރަނގަޅު ކުޅުމެއް ދެއްކިއިރު ކެޕްޓަން ވޭން ރޫނީ ފެނުނީ މެދުތެރެއިން ހުސްވާޖާގަތަކަށް ދުވަނިކޮށެވެ.
މި މެޗުން މޮޅުވުމުން އިނގިރޭސި ކޯޗު ސޭމް އެލާޑީސް ބުނީ އޭނާގެ ފުރަތަމަ މެޗުން މޮޅުވުމުން ވަރަށް އުފާވެއްޖެ ކަމަށާއި މެޗު އެއްވަރުވިޔަސް އޭނާ ހިތްހަމަޖެހޭނެ ކަމަށެވެ. އަދި ރޫނީ ކުޅެންވީ ޕޮޒިޝަން ކަނޑައަޅަން އޭނާ އަށް އުނދަގޫވެއްޖެ ކަމަށާއި ކޮންމެ މަގާމަކަށް ވެސް ކެޕްޓަން މޮޅަށް ކުޅޭކަމަށެވެ.
އެލާޑީސް މިހެން ބުނީ އެންމެ ފަހުގެ ޔޫރޯގައި މި ދެ ޓީމު ކުޅެ 0-0އިން އެއްވަރުވެފައިވާތީ އެވެ.