ޓީމާ އަލަށް ހަވާލުވި ކޯޗު ޖޫލިއަން ލޮޕެޓްގުއިގެ އިރުޝާދުގެ ދަށުން ކުޅުނު ވާދަވެރި ފުރަތަމަ މެޗުގައި 8-0އިން ސްޕޭން ކާމިޔާބުކޮށްފި އެވެ.
ވޯލްޑް ކަޕް ކޮލިފައިންގައި ލިޗެންސްޓައިން ކޮޅަށް ސްޕޭނުގެ އަށް ގޯލުގެ ތެރެއިން ޗެލްސީގެ ފޯވަޑް ޑިއެގޯ ކޯސްޓާ އާއި ޑޭވިޑް ސިލްވާ އަދި އަލްވާރޯ މޮރާޓާކުރެ ކޮންމެ މީހަކު ދެ ލަނޑު ޖެހި އެވެ. އަނެއް ދެ ލަނޑު ޖެހީ ރޮބާޓޯ އާއި ވިޓޯލޯ އެވެ.
މެޗަށް ފަހު ކޯޗު ބުނީ ޓީމުގެ ދެއްކި ކުޅުމަށް ކުޅުންތެރިންނަށް މަރުހަބާކިޔާ ކަމަށެވެ.
"އަހަރެން ކުޅުންތެރިންނަށް މަރިހަބާކިޔަން. އެއީ އެމީހުން ކުޅުނީ ވަރަށް ފުރިހަމަ މެޗެއް. އަހަރުމެންގެ ނިންމާލުންތައް ވަރަށް ރަނގަޅު. މިއީ އިޓަލީއާ ދެކޮޅަށް ނުކުތުމުގެ ކުރިން އަހަރުމެންނަސް ލިބޭނެ ވަރަށް ބޮޑު ހިތްވަރެއް،" ކޯޗު ބުންޏެވެ.
ސްޕޭނާ އެއް ގްރޫޕެއްގައި ހިމެނޭ އިޓަލީ މޮޅުވީ އިޒްރޭލް އަތުން 3-0އިންނެވެ. ލަނޑު ޖެހީ ގްރެޒިއާނޯ ޕެއްލޭ އާއި ކިރޯ އިމޮބައިލް އަދި އެންޓޯނިއޯ ކަންޑްރޭވާ އެވެ. މި މެޗުގައި ދެ ވަނަ ރީނދޫކާޑާއެކު ޖިއޯޖިއޯ ކިއެލީނީ އަށް ވަނީ ރަތްކާޑު ދައްކައިފަ އެވެ.
ކޮލިފައިންގައި ރޭ ވޭލްސް މޮޅުވީ ގެރެތް ބޭލްގެ ދެ ގޯލާއެކު މޯލްޑޯވާ އަތުން 4-0އިންނެވެ. ބޭލްގެ ކުރިން ލަނޑު ޖެހީ މެޗުގެ މޮޅު ކުޅުންތެރިޔާގެ މަގާމި ހޯދި ޖޯއަލެން އާއި ސެމް ވޯކްސް އެވެ.
ކްރޮއޭޝިޔާ އާއި ތުރުކީ ވާދަކޮށް 1-1އިންވީ އެއްވަރެވެ. އަދި ޔުކްރޭނާއި އައިސްލޭންޑް ވާދަކުރި މެޗުގެ ވެސް ނިމުނީ މި ނަތީޖާއިންނެވެ.