ގްރޭންޑް ސްލޭމްގައި އެންމެ ގިނަ މެޗުން މޮޅުވުމުގެ ރެކޯޑް އޮންނަ ރޮޖާ ފެޑަރާގެ ރެކޯޑާ މަޝްހޫރު އަންހެން ޓެނިސް ކުޅުންތެރިން ސެރީނާ ވިލިއަމްސް ހަމަހަމަކޮށްފި އެވެ.
ޔޫއެސް އޯޕަންގައި އިއްޔެ ޔްރޮސްލާވް ޝެވެޑޯވާ އަތުން ސީދާ ސެޓުން މޮޅުވި މެޗާއެކު ސެރީނާ ވަނީ ފެޑަރާގެ 308 މެޗުގެ ރެކޯޑާ އަރާ ހަމަކޯށްފަ އެވެ. އަދި މާދަމާ ކުއާޓާފައިނަލުގައި ރޫމޭނިޔާގެ ސިމޯނާ ހަލެޕް އަތުން އޭނާ މޮޅުވެއްޖެނަމަ މި ރެކޯޑް މުޅިން އަމިއްލަ ކުރެވޭނެ އެވެ.
1999 ވަނަ އަހަރު ޓެނިސް ކުޅެން ފެށި އުމުރުން 34 އަހަރުގެ ކުޅުންތެރިޔާ މެޗަށް ފަހު ބުނީ މިއީ ވަރަށް ބޮޑު އަދަދެއް ކަމަށާއި މިހާ ގިނަ މެޗުތަކުން އޭނާ މޮޅުވުމަށްވުރެ ބޮޑަށް ފަހުރުވެރިވަނީ ޓެނިހުގައި ހޭދަކުރި ދިގުކެރިއަރުގައި އެއްފެންވަރެއްގައި ގިނަ ދުވަހު ކުޅުން ދެމެހެއްޓޭތީ ކަމަށެވެ.
ސެރީނާ އަތުން އިއްޔެ ބަލިވި ޝެވެޑޯވާ ބުނީ އެއީ ދުނިޔޭގެ އެންމެ މޮޅު އެއް ކުޅުންތެރިޔާ ކަމަށާއި މިހެންވެ ބަލިވިޔަސް އޭނާ އަށް ގެއްލޭނެ އެއްޗެއް ނެތުމުން މެޗުގައި އެއްވެސްވަރަކަށް ހާސްނުވާ ކަމަށެވެ.
ސެރިނާ ކުއާޓާ ފައިނަލް ކާމިޔާބުކުރާނެ ކަމަށް ގިނަ ބަޔަކު ތިބީ އުއްމީދުކޮށްގެންނެވެ. އެއީ އޭނާ ވާދަކުރަންޖެހޭ ސިމޯނާއާ ވާދަކޮށް މިހާތަނަށް ހަތް މެޗެއް ކާމިޔާބުކޮށްފައިވާތީ އެވެ.