މާލޭގައި ބަހައްޓާ "އާރްއޯ ޕްލާންޓު" ގެ އިމާރާތް ހަދަން 3.8 މިލިއަން ރުފިޔާއަށް އަލާފް ކޮންސްޓްރަކްޝަނާ ގައުމީ ފެން ކުންފުނިން މިއަދު ހަވާލުކޮށްފި އެވެ.
ގައުމީ ފެން ކުންފުނި، އެމްޑަބްލިއުއެސްއީގައި ބޭއްވި ރަސްމިއްޔާތެއްގައި ފެން ކުންފުނީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު ފަޒުލް ރަޝީދެވެ. އަދި އަލާފްގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަސްރަފު ރަޝީދު އެވެ.
އެމްޑީ ފަޒުލް ވިދާޅުވީ ހަވީރީ ހިނގުމުގައި ބަހައްޓާ އާރްއޯ ޕްލާންޓުގެ އިމާރާތް 150 ދުވަހުގެ ތެރޭގައި ނިންމާއިރަށް އާރްއޯ ޕްލާންޓް ބެހެއްޓިގެންދާނެ ކަމަށެވެ.
"ފެނުގެ ސެކިއުރިޓީ ގާއިމްކޮށްދޭން ކުރާ މަސައްކަތުގެ ބައެއް މިއީ. މި މަސައްކަތް ވަކި ހިސާބަކަށް މަސައްކަތް ދިޔައީމަ އާރްއޯ ޕްލާންޓް ބެހެއްޓުމުގެ މަސައްކަތް ކުރާނެ،" ފަޒުލް ވިދާޅުވި އެވެ.
އޭނާ ވިދާޅުވީ މި މަސައްކަތް ކުރިއަށްދަނީ ރައީސް އަބްދުﷲ ޔާމީންގެ ބެލުމުގެ ދަށުން ކަމަށާއި، ކުރިއަށް އޮތް ތާނގައި ވެސް މިފަދަ މަޝްރޫއުތައް ކުރިއަށްދާނެ ކަމަށެވެ.
"މި ފްލާންޓްތަކީ އިމަޖެންސީ ހަލާތްތަކާއި ޑިމާންޑާ އެއްވަރަށް ފެން ފޯރުކޮށް ދިނުމަށް އެހީވެދޭނެ،" ފަޒުލް ވިދާޅުވި އެވެ.
ފަޒުލް ވިދާޅުވީ މިހާރު މަސައްކަތް ކުރަމުންދާ އިމާރާތުގައި އިތުރު ދެ ޕްލާންޓެއް ބެހެއްޓޭނެ ކަމަށެވެ.
"ކުރިއަށް އޮތް ތާނގައި ޑިމާންޑް އުފުލޭ ވަރަކަށް އިތުރު ޕްލާންޓްތައް ބެހެއްޓޭނެ،" ފަޒުލް ވިދާޅުވި އެވެ.