ޗެމްޕިއަން ލެސްޓާ ސިޓީ ކޮޅަށް ޗެލްސީގެ ކުޅުންތެރިން ރޭ ޖެހި ތިން ގޯލު އެ ޓީމަށް ކުޅޭ ބްރެޒިލްގެ ވިލިއަން އަށް ހާއްސަކޮށްފި އެވެ.
މެޗަށް ފަހު ބެލްޖިއަމްގެ މިޑްފީލްޑަރު އެޑެން ހަޒާޑް މިކަން އިއުލާނު ކުރަމުން ބުނީ މިހެންނެވެ.
"އޭނާގެ މަންމަ ވަނީ ނިޔާވެފައި. އަހަރުމެން އޭނާއާ މެދު ވިސްނަން. އަހަރެންގެ މި ގޯލު ހަދިޔާކުރަނީ އޭނާ އަށް. އަހަރެން އުއްމީދު ކުރަނީ ކުރިއަށްވުރެ ވަރުގަދަކޮށް އޭނާ އަލުން ދަނޑަށް އަންނާނެ ކަމަށް،" ހަޒާޑް ބުންޏެވެ. ވިލިއަން ހަނދާން ކުރަމުން ހަޒާޑް ދައްކައިދީފައި ވަނީ ވިލިއަންގެ ޖޯޒީ ނަމްބަރު 22 އެވެ.
ހަތް ވަނަ މިނިޓްގައި ޗެލްސީގެ ފުރަތަމަ ލަނޑު ޖެހުމަށްފަހު ޑިއެގޯ ކޯސްޓާ ވެސް ހަނދާންކުރީ ވިލިއަން މަތިންނެވެ. ލަނޑު ޖަހާފައި ދެއަތުން އޭނާ ދައްކާލީ ވިލިއަންގެ ނަން ފެށޭ ޑަބްލިއު އަކުރެވެ.
މެޗުގެ ކުރިން ކެޕްޓަން ޖޯން ޓެރީ ވެސް ވިލިއަންގެ ހިތާމައިގައި ބައިވެރިވި އެވެ.
"އަހަރުމެންނަށް މި ހަފުތާގައި މިލިބުނީ ހިތާމަވެރި ހަބަރެއް. ވިލިއަންގެ މަންމަ ވަނީ ނިޔާވެފައި. އަހަރުމެން އެންމެންގެ ފަރާތުންނާއި ކުލަބުގެ ފަރާތޔން އޭނާ އާއި އޭނާގެ އާއިލާއަސް ތައުޒިޔާކިޔަން. މިއުނދަގޫ ވަގުތުގައި އޭނާ އަހަރުމެން މިތިބީ އޭނާއާއެކުގައި. ވިލީ. އަހަރުމެން މިތިބީ ކަލެއާއެކު. ކަލެއަށްޓަކައި މިމެޗު ކާމިޔާބުކުރަން އަހަރުމެން ބޭނުންނުން،" ޓެރީ ލިޔެފައިވެ އެވެ.
މި ސީޒަނުގައި ޗެލްސީގެ ފުރަތަމަ 11 ގައި ބަރާބަރަށް ކުޅެމުން އައި ނަމަވެސް މިރޭގެ މެޗުގައި ވިލިއަން ނުކުޅެ އެވެ. އޭނާގެ ބަދަލުގައި ފުރަތަމަ 11 ގައި ކުޅުނީ ސްޕޭނުގެ ޕެޑްރޯ އެވެ.