ފުރަތަމަ މަރުހަލާގެ ކޯޓްތަކާއި ޓްރައިބިއުނަލްތަކުގެ ނިންމުންތައް ހައިކޯޓާއި އެ ކޯޓްގެ ގޮފިތަކުގައި އިސްތިއުނާފު ކުރުމަށް ހުށަހަޅަންޖެހޭ 10 ދުވަހުގެ ތެރޭގައި ދެމެދަށް އަންނަ ސަރުކާރު ބަންދު ދުވަސްތައް ނުހިމެނޭ ގޮތަށް ސުޕްރީމް ކޯޓުން ހަމަޖައްސައިފި އެވެ.
އުއްތަމަ ފަނޑިޔާރު އަބްދުﷲ ސައީދު ސޮއި ކުރައްވާ މިއަދު ނެރުއްވި ސިޓީއެއްގައި ވިދާޅުވެފައި ވަނީ ފުރަތަމަ މަރުހަލާގައި ހިމެނޭ ކޯޓްތަކާއި ޓްރައިބިއުނަލްތަކުން ކުރާ ހުކުމްތަކާއި ނިންމުންތައް އިސްތިއުނާފު ކުރުމަށް ހުށަހަޅަންޖެހޭ 10 ދުވަހުގެ މުއްދަތު ގުނާނީ މައްސަލަ ނިންމި ދުވަހާއި އިސްތިއުނާފުގެ މުއްދަތު ހަމަވާ ދުވާހާ ދެމެދަށް އަންނަ ސަރުކާރު ބަންދު ދުވަސްތައް ނުހިމެނޭ ގޮތަށް ކަމަށެވެ.
ފުރަތަމަ މަރުހަލާގެ ކޯޓްތަކާއި ޓްރައިބިއުނަލްތަކުން ނިންމާ ނިންމުންތައް އިސްތިއުނާފު ކުރުމަށް ހުށަހެޅުމުން އިސްތިއުނާފު ކުރަންޖެހޭ ކޯޓަށް މައްސަލަ ނިންމި ކޯޓުން ނުވަތަ ޓްރައިބިއުނަލް އިން މައްސަލައިގެ ފައިލް ލިޔުންތަކާއެކު ފޮނުވަންޖެހޭ ހަތް ދުވަސް ގުނާނީ ވެސ ދެމެދަށް އަންނަ ސަރުކާރުގެ ބަންދު ދުވަސްތައް ނުހިމަނާ ކަމަށެވެ.