ޓޮޓަންހަމްހޮސްޕާ އަތުން 1-0 މޮޅުވެ މެންޗެސްޓާ ޔުނައިޓަޑް އެއް މަސް ފަހުން ލީގްގައި ފުރަތަމަ މޮޅު ހޯދައިފި އެވެ.
ރޭގެ މެޗްގެ ކުރިން، ޕްރިމިއާ ލީގްގައި އެންމެ ފަހުން މޮރީނިއޯ އަށް މޮޅުވެވުނީ މި ދިޔަ މަހު ހަ ވަނަ ދުވަހު ސްވަންސީ ސިޓީ އަތުން ނެވެ.
އަމިއްލަ ދަނޑު އޯލްޓްރެފާޑްގައި ކުޅުނު މެޗްގައި ޔުނައިޓަޑްގެ ހަމައެކަނި ލަނޑު ކާމިޔާބު ކުރީ އެންޑެ ހެރޭރާ ތަނަވަސް ކޮށްދިން ފުރުސަތަކުން ހެންރިކް މިހްތާރިޔަންއެވެ.
މެޗްގައި މޮޅު ކުޅުމެއް ދެއްކި މިހިތާރިޔަން ޖެހި ލަނޑަކީ ޕްރިމިއާ ލީގްގައި އޭނާ ޖެހި ފުރަތަމަ ލަނޑެވެ. އަދި އަމިއްލަ ދަނޑުގައި ކަމިޔާބު ކުރި ފުރަތަމަ ލަނޑުވެސް މެއެވެ.
މެޗްގެ 82 ވަނަ މިނެޓްގައި ޑެނީ ރޯސް ކުރި ފައުލާ ގުޅިގެން، މިހިތާރިޔަންގެ ފައިގެ ކުޑަ ހުޅަށް ލިބުނު އަނިޔާއާ ގުޅިގެން އޭނާ ދަނޑުން ބޭލީ އަށިގަނޑުގައެވެ. ލަފާ ކުރެވޭ ގޮތުގައި އެ އަނިޔާއާ ގުޅިގެން އޭނާ އަށް ދެ މެޗަށް ކުޅުމާ ދުރަށް ދާން ޖެހޭނެއެވެ.
ޔުނައިޓަޑްގެ ކޯޗް ހޯސޭ މޮރީނިއޯ ބުނީ މެޗްގެ މޮޅު ކުޅުންތެރިޔަކީ މިހްތާރިޔަން ކަމަށެވެ.
"އެބޯޅަ އަށް ކުރި މަސައްކަތާއި އެބޯޅަ ނިންމާލި ގޮތް އަހަންނަށް ވަރަށް ބޮޑަށް ކަމުދޭ، އަހަރެމެން ތިބީ އެ ކައުންޓާ އެޓޭކަށް ވަރަށް ބޮޑަށް ތައްޔާރު ވެގެން، އަހަރެމެން ޖެހީ ވަރަށް މޮޅު ގޯލެއް އަދި އެ ގޯލަކީ އަހަރެމެންނަށް ވަރަށް މުހިންމު ގޯލެއް." މޮރީނިއޯ ބުންޏެވެ.
"މެޗްގެ މޮޅު ކުޅުންތެރިޔާ ހައްގު ވަނީ ކީޕަރަކަށް ނޫން އެ ހައްގު ވަނީ މިހިތާރިޔަން އަށް."
ޔުނައިޓަޑް އޮތީ އެއް ވަނައިގައި އޮތް ޗެލްސީއާ 13 ޕޮއިންޓްގެ ފަރަގެއްް ގައެވެ. މިވަގުތު ލީގް ހަ ވަނައިގައި އޮތް ޓީމުގެ އަމާޒަކީ ހަތަރު ވަނަ އެވެ.
"އަހަރެމެންގެ މަގްސަދަކީ އިމްޕްރޫވް އަދި އިމްޕްރޫވް އަދި އިމްޕްރޫވް އަދި އެއް ދުވަހަކުން ތައްޓާ ގާތަށް ދިއުން މެޗުން ބަލިވި ނަމަވެސް އެކަމަކަށް އަސަރެއް ނުކުރާނެ. އެކަމަކު މި ސީޒަންގައި އަހަރެމެންގެ އަމާޒެއް އެބައޮތް މެޗުން މޮޅުވުމުން އަހަރެމެންނަށް އެހިސާބަށް ދިއުމަށް ފަސޭހަ ވެއްޖެ އަހަރެމެންގެ އަމާޒު އޮތީ ފަހަކަށް އަދި ހަތަރަކަށް."
ރޭ ލިވަޕޫލްއާ ވެސްޓްހަމް ޔުނައިޓަޑް ބައްދަލު ކުރި މެޗު ނިމުނީ 2-2 ން އެއްވަރުވެގެންނެވެ.