ސްރީލަންކާގެ ސިފައިންގެ ލަޝްކަރުތައް ދޫކޮށް، ފިލައިގެން އުޅުނު 450 މީހަކު އެ ގައުމުގެ ސަރުކާރުން ހޯދައި ހައްޔަރު ކޮށްފި އެވެ.
ލަންކާ ސިފައިންގެ ތަރުޖަމާނު ބްރިގޭޑިއާ ރޯހަން ސެނެވިރަތުނައާ ހަވަލާދީ ސަންޑޭ ޓައިމްސް ނޫހުން ބުނީ ހައްޔަރު ކުރި 450 މީހުންނަކީ ގާނޫނީ ހަމަތަކުގެ މަތިން ވަޒީފާއިން ވަކިވުމަށް ދިން ފުރުސަތުގައި އެގޮތަށް އަމަލު ނުކޮށް ފިލި މީހުން ކަމަށެވެ.
ލަންކާ ސިފައިންގެ ވަޒީފާއިން ފިލި މީހުން ގާނޫނީ ހަމަތަކުގެ މަތިން ވަޒީފާއިން ވަކިވުމަށް ހުޅުވައިލި މުއްދަތު ހަމަ ވުމުން މިހައިތަނަށް ހައްޔަރުކޮށްފައި ވަނީ އެގައުމުގެ އެއްގަމު ސިފައިންގެ 313 މީހުންނާއި އޮފިސަރަކާއި ކަނޑުގެ ސިފައިންގެ 133 އަދި ވައިގެ ސިފައިންގެ 11 މީހުންނެވެ.
ލަންކާގެ ލަޝްކަރުތައް ދޫކޮށް ފިލި މީހުން އަނބުރާ އައިސް ގާނޫނީ ހަމަތަކުގެ މަތިން ވަކިވުމަށް އެންމެ ފަހުން ހުޅުވައިލީ މިދިޔަ އަހަރުގެ ޑިސެމްބަރު މަހުގެ ފުރަތަމަ ދުވަހުން ފެށިގެން އެމަހުގެ ނިޔަލަށެވެ.
ފިލައިގެން އުޅުނު ގާތް ގަނޑަކަށް 9000 ސިފައިން އެ މުއްދަތުގައި އަނބުރާ ވަޒީފާއަށް ނުކުމެ، ގާނޫނީ ހަމަތަކުގެ މަތިން ވަކިވުމަށް ވަނީ އެދިފައެވެ. އޭގެ ތެރޭގައި އޮފިސަރުންގެ ރޭންކްގައި ތިބި މީހުން ވެސް ހިމެނެއެވެ.
ލަންކާ ސިފައިން ޕެރޭޑެއްގައި. ވަޒީފާއިން ފިލި 450 މީހަކު ވަނީ ހައްޔަރުކޮށްފައި. ފޮޓޯ : ފިނޭންޝަލް ޓައިމްސް