އައްޑޫ ސިޓީ ހިތަދޫގައި ބޭންކް އޮފް މޯލްޑިވްސްއިން އެންމެ ޒަމާނީ ކޯލް ސެންޓަރު ނޫނީ، ކޮންޓެކްޓް ސެންޓާ އެއް މިއަދު ހުޅުވައި ހިދުމަތް ފަށައިފި އެވެ.
ކުރިން ބީއެމްއެލް ހިތަދޫ ބްރާންޗްގެ ގޯތިތެރޭގައި ހިންގަމުން ގެންދިޔަ ކޮންޓެކްޓް ސެންޓާގެ މަސައްކަތްތައް މިހާރު ކުރަމުން ގެންދާނީ މަސައްކަތް ކުރުމަށް ބޭނުންވާނެ އެންމެ ފަހުގެ ވަސީލަތްތަކާ އެކު މިއަދު ހުޅުވި ކޮންޓެކްޓް ސެންޓަރުގަ އެވެ އެ ސެންޓަރު ހުޅުއްވައި ދެއްވީ އައްޑޫގައި މިއަދު ޭއްވި ރަސްމިޔާތެއްގައި ބީއެމްއެލްގެ ސީއީއޯ އެންޑްރޫ ޖޭ ހީލީ އެވެ.
ބީއެމްއެލްއިން ބުނީ، ބޭންކުގެ ހިދުމަތްތައް ހޯދަމުންދާ ކަސްޓަމަރުންގެ އަދަދު އިތުރުވަމުންދާއިރު އެފަރާތްތަކަށް ފަސޭހަކަމާއެކު އަވަހަށް ހިދުމަތްތައް ފޯރުކޮށްދިނުމަށް އެ ސެންޓަރުގައި ވަޒީފާ އަދާކުރާ މުވައްޒަފުންގެ އަދަދު ކުރިއަށް އޮތްތާނގައި އިތުރުކުރާނެ ކަމަށެވެ.
ބީއެމްއެލްގެ ސީއީއޯ ކޮންޓެކްޓް ސެންޓަރުގެ މުވައްޒަފުންނާ މިއަދު ބައްދަލުކުރައްވާ، ވިދާޅުވީ، ކަސްޓަމާ ސާވިސް އަކީ ބީއެމްލްގެ ހިދުމަތްތައް ބައްޓަން ކުރުމުގެ އެންމެ މުހިންމު އެއް ތަނބު ކަމަށާއި އެހެންކަމުން އަދިވެސް ބޭންކުން ފޯރުކޮށްދޭ ހިދުމަތް އިތުރަށް ރަނގަޅުކުރަން ޖެހޭ ކަމަށެވެ.
"އަޅުގަނޑުމެންގެ ފަރާތުން ކަސްޓަމަރުން ބޭނުންވަނީ އެންމެ ރަނގަޅު ހިދުމަތް ލިބެން. މޮބައިލް އެޕް ފަދަ އޮންލައިން ޓެކްނޮލަޖީ ބޭނުންކޮށްގެން އަޅުގަނޑުމެންގެ ހިދުމަތްތައް ކަސްޓަމަރުން ހޯދުމަށް ބޭންކުން ހިތްވަރު ދިން ނަމަވެސް އެފަރާތްތަކުން ބްރާންޗްތަކަށް ނުވަތަ ބިޒްނަސް ސެންޓާތަކަށް ގޮސްގެން ނުވަތަ ކޮންޓެކްޓް ސެންޓާ މެދުވެރިކޮށް ނަމަވެސް އަޅުގަނޑުމެންގެ މުވައްޒަފުންނާ ސީދާ މުއާމަލާތްކުރެވޭނެ ގޮތްތައް ހުރުން މުހިންމު،" ހީލީ ވިދާޅުވި އެވެ.
ހީލީ ވިދާޅުވީ، ބީއެމްއެލްއިން ފޯރުކޮށްދޭ ހިދުމަތްތަކުގެ ފެންވަރު ރަނގަޅުކުރުމަށް ގިނަ އިންވެސްޓްމަންޓްތަކެއް ކުރަމުންދާ ކަމަށެވެ. އެގޮތުން އެ ކޮންޓެކްޓް ސެންޓަރާއެކު ކަސްޓަމަރުންނަށް އެހީތެރިވުމަށް ހާއްސަ ތަމްރީން ލިބިފައި ތިބި މުވައްޒަފުންތަކެއް ހިދުމަތަށް ނިކުތުމުން ކަސްޓަމަރުންނަށް އެންމެ އެކަށީގެންވާ ގޮތެއްގައި ރަނގަޅު ހިދުމަތެއް ފޯރުކޮށްދެވޭނެ ކަމަށް ސީއީއޯ ވިދާޅުވި އެވެ.
ބީއެމްއެލްގެ ކަސްޓަމަރުންގެ އަދަދު 270,000 އަށްވުރެ ގިނަ އެވެ. މިދިޔަ އަހަރު އެކަނިވެސް 20،000 އަށްވުރެ ގިނަ އާ ކަސްޓަމަރުން ބޭންކާ ގުޅިފައިވާ ކަމަށް އެ ބޭންކުން ބުންޏެވެ.
މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 31 ބްރާންޗް، 78 އޭޓީއެމް، 4000 ޕީއޯއެސް މާޗަންޓުން، 200 ކޭޝް އޭޖެންޓުން، 20 ސެލްފްސާވިސް ބޭންކިން ސެންޓާ އަދި ފަސް ދޯނި ބޭންކިން ޔުނިޓުގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބޭންކް އޮފް މޯލްޑިވްސް ގެ އަމާޒަކީ އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.