މި އަހަރުގެ މާޗު 27 ވަނަ ދުވަހު ބޭއްވި ރައްޔިތުން މަޖިލީހުގެ ރައީސް، އަބްދުﷲ މަސީހު މުހައްމަދުގެ އިތުބާރު ނެތް ކަމުގެ މައްސަލައަށް މުޅި ސިޔާސީ މަސްރަހުގެ ނަޒަރު ހުއްޓިފައި އޮތެވެ. އެ ދަނޑިވަޅާ ދިމާކޮށް ބައެއް މެންބަރުން އެކި ފަހަރުގެ މަތިން ކޮޅު ބަދަލު ކުރާ ކަމަށް ވާހަކަތައް ނުކުތެވެ. އެހެންވެ އެ ވޯޓުގެ ނަތީޖާ ނުކުމެދާނެ ގޮތަކާމެދު އޭގެ ކުރިން ވަރަށް ގިނަ ވާހަކަ ދެކެވުނެވެ. އެކަން ނިމިގެން ދިޔައީ އެވެ.
މާ ގިނަ ދުވަސްތަކެއް ނުވެ ފެންމަތިވެގެން ދިޔައީ މަޖިލީސް މެންބަރުން ގަތުމަށް މެންބަރު ފާރިސް މައުމޫނު މަސައްކަތް ކުރެއްވި ކަމަށް ބުނާ ވާހަކަ އެވެ. އޭގެ ހަގީގަތެއް ސާފެއް ނުވެއެވެ. ގައުމު ހަމަ މަގަށް އެޅުވުމަށް ކަމަށް ބުނެ މަޖިލީހުގެ މެންބަރުންނަށް ރިޝްވަތު ދޭން އުޅުއްވި ކަމަށް ބުނާ މައްސަލައިގެ ތުހުމަތުގެ އިނގިލިތައް ފާރިސް މައުމޫންއާ ދިމާލަށް ވަނީ އަމާޒުވެފައެވެ. އެ ތުހުމަތުތައް އޮއްވާ ފާރިސްގެ އަމަލުތައް ހުންނަ ގޮތުން ސުވާލުތައް އުފެދެ އެވެ. ސުވާލު އުފެދެނީ އެއްވެސް ތަހުގީގަކަށް އެއްބާރުލުން ނުދެއްވާތީ އެވެ. "ޖެހިލުމެއް ނެތި ކުރިމަތިލާނަން" ކަމަށް ވިދާޅުވާ އިރު ރިޝްވަތުގެ ތުހުމަތަށް ފާރިސް ހުންނަވަނީ ހަނު އެވެ. އެފަދަ އަމަލެއް ހިންގާފައިވާ ކަމަށް ތުހުމަތު ކުރާ އިރު އެ މައްސަލާގެ ޖަވާބު ދާރީވެ ދިފާއުވެ ވަޑައިގަތުމަށް މަސައްކަތްޕުޅެއް ނުކުރައްވަ އެވެ. މިއީ ފާރިސްގެ އިހްލާސްތެރިކަމާ ސުވާލު އުފެދޭ ކަމަކަށް ނުވާނެ ހެއްޔެވެ؟
"ގާނޫނުގައި ވަރަށް ސާފުކޮށް ފާރިސްއަށް ވެސް ޖަވާބު ދާރީވުމަށް ފުރުސަތު ލިބޭނެ. ދިފާއުގައި ވަކާލާތުކޮށް ވަކީލުން ގެނެސްގެން އެ ކުރާ ތުހުމަތުތަކާ ދެކޮޅަށް ކޯޓަށް ވެސް ދެވިދާނެ. ނަމަވެސް މިއިން އެއްވެސް ކަމަކަގެން އެބޭފުޅާ ނޫޅުއްވާ. އޭގެ ބަދަލުގައި ހަނު ހުންނަވަނީ. މިއީ ފާރިސް މީޑިއާތައް ކުރިމަތީ އެ ދައްކާ ވާހަކަތަކުގައި ހުރި އިހްލާސްތެރިކަމާއި ތެދުވެރި ކަމަށް ވަރަށް ބޮޑަށް ސުވަލު އުފެދޭ ކަމެއް،" ޕީޕީއެމްގެ އިސް މަގާމެއްގައި ހުންނެވި ބޭފުޅަކު "އަވަސް" އަށް ވިދާޅުވި އެވެ.
އެ މައްސަލާގައި ފާރިސް "އަނގަ ބަނދުވުން" އެއްފަރާތްކޮށްލާފައި އެކަމުގެ ސަބަބުން ނިކުމެދާނެ އެހެން މައްސަލައެއް ވެސް އޮންނާނެކަން ހަނދާން ނައްތާލައިގެން ނުވާނެ އެވެ. ދެކެވެނީ ރައްޔިތުން މަޖިލީހުގެ މެންބަރުންގެ ވާހަކަ ކަމަށްވާތީ އެވެ. އިންތިހާބު ކުރި އެ މެންބަރުންނަށް ރިޝްވަތު ދޭ ވާހަކައެކެވެ. އެހެންކަމުން އެފަދަ ތުހުމަތުތަކަށް ޖަވާބުދާރީ ނުވެ އެކަމަށް ހަނު ހުންނެވުމަކީ ރައްޔިތުން މަޖިލީހުގެ ހައިބަތަށް ވެސް އުނިކަން ލިބޭނެ ކަމެއް ކަމަށް ބައެއް މީހުން ދެކެވެ. އެފަދަ ފަރާތްތައް ގަބޫލު ކުރާ ގޮތުގައި އެހެންކަމުން ފުލުހުންގެ މި ތުހުމަތުތަކަށް ޖަވާބުދާރީވެ ދައުލަަތުގެ މުހިންމު އެއް ބާރުގެ އަގު ހިފެހެއްޓުމާއި، ތުހުމަތުތަކުން ބަރީއަވެ، އެފަދަ ރިޝްވަތުގެ އަމަލެއް ހިންގާ ފަރާތްތައް ހުއްޓުވުމަށް ވެސް ފުލުހުންނަށް އެހީތެރިވެދެއްވަން ޖެހޭނެ އެވެ.
ވަކީން ހާއްސަކޮށް ރައްޔިތުން މަޖިލީހުގެ މެންބަރަކަށްވާއިރު އެކަން ނުކުރައްވާ ހަނު ހުންނެވުމަކީ ޝައްކުތައް ބޮޑުވާނެ ކަމެކެވެ.
ސުވާލު އުފެދޭ އަނެއް މައްސަލަ އެވެ. މަސީހުގެ އިތުބާރު ނެތްކަމުގެ ވޯޓާ ދިމާކޮށް ފާރިސް މަޖިލީހުގެ މެންބަރުންނަށް ރިޝްވަތުގެ ގޮތުގައި ފައިސާ ބެއްސެވި ކަމަށް ކުރާ ތުހުމަތުގައި އެ ފައިސާ ރައްކާކޮށްގެން ގެންގުޅުނު ކަމަށް ބުނެ އަހުމަދު ސޮފްވާންއަށް ފުލުހުން ތުހުމަތު ކުރެ އެވެ.
ސޮފްވާންއަކީ ރައީސް މައުމޫންގެ ވަރަށް ގާތް ބޭފުޅެކެވެ. ޕީޕީއެމުން ރައީސް މައުމޫން ވަކިވެގެން ދިޔައިރު އަމިއްލަ ފުޅަށް އުފެއްދެވި ކައުންސިލެއްގައި ވެސް ސޮފްވާން ހިމެނެ އެވެ. އަދި މުހިންމު ބައްދަލުވުންތަކާއި ބޮޑެތި މައްސަލަތައް ނިންމުމުގައި އޭނާ ބައިވެރިކުރެ އެވެ.
އެހެންކަމުން ސޮފްވާން ކުއްލިއަކަށް ގެއްލިގެން އުޅޭނަމަ އެންމެ ފުރަތަމަ ނިކުންނަވާނީ ވެސް ރައީސް މައުމޫން ކަމަށް ގަބޫލު ކުރެވެ އެވެ. ނަމަވެސް ފުލުހުން ތުހުމަތު ކުރާ ފަދައިން ސޮފްވާން ފިލައިގެން އުޅުއްވާތީ ރައީސް މައުމޫން ވެސް އަދި ފާރިސް މައުމޫން ވެސް ބޭނުން ކުރައްވަނީ ގާނޫނުގައި ލިބިދޭ ހަނު ހުރުމުގެ ބާރެވެ. މިއީ ވަރަށް ބޮޑު މައްސަލައެއް ނޫން ހެއްޔެވެ؟