ލަކަޒެޓް އާސެނަލް އަށް ބަދަލުވުމާ ގާތަށް

އޮލިމްޕިކް ލިއޯން އަށް ކުޅެމުންދާ ފްރާންސްގެ ފޯވަޑް އެލެކްޒަންޑަ ލަކަޒެޓް އާސެނަލް އަށް ބަދަލުވުމާ ގާތަށް ޖެހިލައިފި ކަމަށް ރިޕޯޓްތަކުން ބުނެފި އެވެ.

ރިޕޯޓްތަކުން ބުނާގޮތުގައި ލަކަޒެޓް ،26، އަށް އާސެނަލް އިން ކުރި ބިޑެއް ކާމިޔާބުނުވި ނަމަވެސް، ދެ ޓީމުގެ މެދުގައި ކުރެވުނު މަޝްވަރާތަކުން މިހާރު ވަރަށް ބޮޑު ކުރިއެރުމެއް ލިބިފައިވާ ކަމަށެވެ. އަދި ވަރަށް އަވަހަށް ދެ ކްލަބުން ލަކަޒެޓްގެ ޑީލް ނިންމާނެ ކަމަށެވެ.

ރިޕޯޓްތަކުން ބުނާގޮތުގައި އާސެނަލް އިން ލަކަޒެޓް ގެންނާނީ ކްލަބުގެ ރެކޯޑް ޓްރާންސްފާ ފީއެއްގަ އެވެ. މި ވަގުތު އާސެނަލްގެ ރެކޯޑް ޓްރާންސްފާ ފީއަކީ މެސުތު އޮޒިލް ގެންނަން ރެއާލް މެޑްރިޑަށް ދިން 42.4 މިލިއަން ޕައުންޑެވެ.

މިިދިޔަ ސީޒަންގައި ލިއޯން އަށް 45 މެޗުން 37 ލަނޑު ޖެހި ލަކަޒެޓް އަށް ޔޫރަޕްގެ ވަރުގަދަ ކްލަބުތަކަކުން ޝައުުގުވެރިވެ އެވެ.

ލަކަޒެޓް އެތުލެޓިކޯ މެޑްރިޑަށް ބަދަލުވާން އުޅުނު ނަމަވެސް، ފީފާ އިން އެތުލެޓިކޯ އަށް ދިން ޓްރާންސްފާ ބޭންއާ ގުޅިގެން ލަކަޒެޓް އަށް އެތުލެޓިކޯ އަށް ބަދަލުވެވޭ ގޮތެއް ނުވި އެވެ.

ލަކަޒެޓް ގެންދަން ކުރާ މަސައްކަތުގައި އާސެނަލް އިން ކުރިއެރުން ހޯދި ނަމަވެސް، މޮނާކޯގެ މިޑްފީލްޑަރު ތޯމަސް ލެމާ ،21، ގެންދަން އެ ކްލަބުން ކުރާ މަސައްކަތަށް ވަނީ ހުރަސްއެޅިފަ އެވެ. ލެމާ ގެންދަން އާސެނަލް އިން ކުރި ބިޑަކަށް މޮނާކޯ އިން ފުރަގަސްދީފައިވާ ކަމަށް ރިޕޯޓްތަކުން ބުނެ އެެވެ.