ރާއްޖެ އާއި ސްރީލަންކާއާ ކައިރިން އިންޑިއާ ކަނޑުގައި އުފެދުނު ކޮޅިގަނޑު "އޯޗީ" އާ ގުޅިގެން ރާއްޖެއަށް ކުރި ވިއްސާރާގައި 62 ރަށަކަށް ގެއްލުން ވެގެން ރިޕޯޓް ކޮށްފައިވާ ކަމަށް މޯލްޑިވްސް ޑިޒާސްޓާ މެނޭޖްމެންޓް ސެންޓަރުން ބުނެފި އެވެ.
ޑިޒާސްޓާގެ ޑިރެކްޓަރު ޖެނެރަލް ސޮފީނާޒް ހަސަން ވިދާޅުވީ، ތޫފާނުގެ ސަބަބުން ރާއްޖެއަށް ކުރި ވިއްސާރާގައި 62 ރަށަކަށް އެކިވަރުގެ ގެއްލުން ވެފައިވާ ކަމަށާއި ނަމަވެސް ވިއްސާރާގައި އެއްވެސް ރަށަކަށް މާލީ އެހީ ތެރިކަން ފޯރުކޮށްދީފައި ނުވާ ކަމަށެވެ. އެގޮތުން ރަށުގައި ފެން ބޮޑުވެ ގޭގެއަށް ފެން ވަދެ ހިފާ ގެންގުޅޭ ތަކެއްޗަށް އެކިވަރުގެ ގެއްލުން ވެގެން 36 ރަށަކުން ރިޕޯޓް ކޮށްފައިވާ ކަމަށް ސޮފީނާޒް ވިދާޅުވި އެވެ.
މީގެ އިތުރުން ވައިގަދަވެ ރުއްގަހާއި ގޭގޭގެ ފުރާޅު އެއްލާލައި 22 ރަށަކުން ރިޕޯޓް ކޮށްފައިވާ ކަމަށެވެ. އަދި އުދައަރައި ޖެޓީ އާއި ވާޓަރަށް އަދި ދޯނި ފަހަރަށް ގެއްލުން ވެގެން ހަތަރު ރަށަކުން ރިޕޯޓް ކޮށްފައިވާ ކަމަށް ސޮފީނާޒް ވިދާޅުވި އެވެ. އަދި ވިދާޅުވީ، ގޭގައި ފެން ބޮޑުވެގެން ގެ ބަދަލުވާން ޖެހިގެން ދެ ރަށެއްގެ ހަތަރު ގެއަކުން ރިޕޯޓް ކުރި ކަމަށެވެ.
"ވިއްސާރާގައިި 62 ރަށަކަށް އެކިވަރުގެ ގެއްލުން ވެގެން ރިޕޯޓް ކޮށްފައިވޭ، އޭގެ ތެރެއިން އެއްވެސް ރަށަކަށް މާލީ އެހީ ފޯރުކޮށްދޭ ވަރުގެ ގެއްލުމެއް ވެގެން ރިޕޯޓް ކޮށްފައެއް ނުވޭ، އެހެންވެ ވިއްސާރާގައި މާލީ އެހީތެރިކަން ފޯރުކޮށްދީފައެއް ނުވާނެ، އެހީތެރިކަމަށް އެދުނު ހުރިހާ ރަށަކަށް ވެސް އެމްއެންޑީއެފް އާއި ޕޮލިސް މެދުވެރިކޮށް އެހީތެރިކަން ފޯރުކޮށްދީފައިވާނެ" ސޮފީނާޒް ވިދާޅުވި އެވެ.
ސޮފީނާޒް ވިދާޅުވީ، މިހާތަނަށް ލިބިފައިވާ ގެއްލުންތަކުގެ ރިޕޯޓް ލިބިފައިވަނީ 19 ރަށަކުން ކަމަށާއި އެކި ރަށްރަށުގެ ދަނޑުބިން ތަކާއި ޖެޓީ އަދި ދޯނި ފަހަރަށް ބޮޑެތި ގެއްލުންތައް ލިބިފައިވާ ކަމަށެވެ. އަދި މި ހަފްތާ ތެރޭގައި ހުރިހާ ރަށަކަށް ލިބުނު ގެއްލުން ތަކުގެ ފުރިހަމަ ރިޕޯޓެއް ލިބުމުން އެރަށް ތަކަށް ފޯރުކޮށް ދޭން ޖެހޭ މާލީ އެހީތެރިކަން ކަނޑައެޅިގެންދާނެ ކަމަށް ސޮފީނާޒް ވިދާޅުވި އެވެ.
"ގެއްލުންވި ރަށްތަކުގެ ތެރެއިން 19 ރަށެއްގެ ތަފްސީލީ ރިޕޯޓް ލިބިފައިވަނީ، މި ހަފްތާ ތެރޭގައި ހުރިހާ ރަށެއްގެ ރިޕޯޓް ލިބިގެންދާނެ ކަމަށް ބެލެވެނީ، އޭރުން ފޯރުކޮށްދޭން ޖެހޭ މާލީ އެހީތެރިކަން އިނގިގެން ދާނީ، އަޅުގަނޑުމެންނެއް ނޫން އެކަމަކު މާލީ އެހީތެރިކަން ފޯރުކޮށް ދޭނީ،" ސޮފީނާޒް ވިދާޅުވި އެވެ.
ސޮފީނާޒް އިތުރަށް ވިދާޅުވީ، ތޫފާނަށްފަހު އިއްޔެ ކުރި ވިއްސާރާގައި ގއ. އަދި ގދ. ގެ ރަށްތަކަށް އެކިވަރުގެ ގެއްލުވެގެން ރިޕޯޓް ކޮށްފައިވާ ކަމަށާއި ގިނަ ރަށްތަކުން ރިޕޯޓް ކޮށްފައިވަނީ ފެން ބޮޑުވެގެން ކަމަށެވެ. އަދި އެރަށްތަކުގެ ތެރެއިން ފެން ހިއްކަން އުނދަގޫވި ރަށަކީ ވާދޫ ކަމަށާއި ނަމަވެސް އެރަށްވެސް މިހާރު ވަނީ އާންމު ހާލަތަށް ގެނެވިފައި ކަމަށެވެ.