ވޭތުވެދިޔަ ފަސް މަހު އިންސާނީ ހައްގުތަކުން ކުޑަކުދިން މަހުރޫމުވެފައިވާ ކަމުގެ 600 އަށްވުރެ ގިނަ މައްސަލަ ޖެންޑާ އަށް ރިޕޯޓް ކޮށްފައިވާ ކަމަށް ޖެންޑާ މިނިސްޓަރު ޒެނީޝާ ޝަހީދު ޒަކީ ވިދާޅުވެއްޖެ އެވެ.
ބައިނަލް އަގުވާމީ އިންސާނީ ހައްގުތައް ރައްކާތެރި ކުރުމުގެ ދުވަހުގެ މުނާސަބަތުގައި ދަރުބާރު ގޭގައި މިރޭ ބޭއްވި ޖަލްސާގައި މިނިސްޓަރު ވިދާޅުވީ، އިންސާނީ ހައްގުތައް ގެއްލިފައިވާ ކަމަށްބުނެ އެންމެ ގިނައިން ކޮމިޝަނަށް ހުށަހަޅާފައިވަނީ ސިއްހީ އަދި އުމުރުން ދުވަސްވީ މީހުންނާއި ހާއްސަ އެހީއަށް ބޭނުންވާ މީހުންނާ ގުޅުންހުރި މައްސަލަތައް ކަމަށެވެ. އަދި ދެވަނަ އަށް އެންމެ ގިނައިން ހުށަހަޅާފައިވާ މައްސަލައަކީ ކުޑަކުދިންނާއި އާއިލާ ތަކާއި ގުޅުންހުރި މައްސަލަތައް ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ވޭތުވެދިޔަ ފަސް މަހު ކުޑަކުދިންގެ ހައްގުތަކުން މަހުރޫމުން ވެފައިވާ ކަމަށް 600 އަށްވުރެ ގިނަ މައްސަލަ ޖެންޑާ އަށް ރިޕޯޓް ކޮށްފައިވާ ކަމަށާއި އުމުރުން ދުވަސްވީ އަދި ނުކުޅެދުންތެރިކަން ހުންނަ 80 އަށްވުރެ ގިނަ މައްސަލަ ރިޕޯޓް ކޮށްފައިވާ ކަމަށެވެ. އަދި ވިދާޅުވީ، ގެވެށި އަނިޔާ އާއި ވަކި ޖިންސަކަށް ވީތީ ކުރާ އަނިޔާގެ 170 އަށްވުރެ ގިނަ މައްސަލަ ޖެންޑާގައި ރިޕޯޓްކޮށްފައިވާ ކަމަށެވެ.
"އިންސަނީ ހައްގުތަކާ ބެހޭ މުއާހަދާތަކުގެ ތެރެއިން ނުވަ މުއާ ހަދާއެއްގައި ރާއްޖެއިން ވަނީ ބައިވެރިވެފަ، އޭގެ ތެރެއިން ހަތް މުއާހަދާއަކަށް އަދި ފަސް އޮޕްޝަނަލް ޕްރޮޓޮކޯލެއް ވަނީ ތަސްދީގު ކުރައްވާފަ، މީގެ އިތުރުވެސް އުނިވަސަލް ޑެކްލަރޭޝަން އޮފް ހިއުމަން ރައިޓްސްގައި ބަޔާން ކުރާ ގިނަ ހައްގުތަކަކީ ރާއްޖޭގެ ގާނޫނުގެ ދަށުން ދަނީ އަމަލު ކުރަމުން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ދައުލަތުގެ ބެލުމުގެ ދަށުގައިވާ ގިނަ ކުދިންނަށް ހަމަހަމަ ފުރުސަތު ތަކެއް ހޯދައި ދިނުމަށް ގިނަ މަސައްކަތް ތަކެއް ކުރަމުންދާ ކަމަށެވެ. އަދި ކޮންމެ ގައުމެއްގައި ވެސް ތަފާތު ކުރުމެއް ނެތި ހަމަހަމަ ކަމާއެކު ހައްގުތައް ރައްކާތެރިކުރުމަަށް މިނިވަން މުއައްސަސާއެއް ހުރުން މުހިންމު ކަމަށާއި އަދި އެ މުއްއައްސަސާގެ ޒިންމާ ބޮޑު ކަމަށް މިނިސްޓަރު ވިދާޅުވި އެވެ.
"އިންސާނީ ހައްގުތައް ކުރިއެރުވުމަށް ކުރިއަށް އޮތް ފަސް އަހަރު ދުވަހަށް އަމާޒުކޮށް ނެޝަނަލް ހިއުމަން ރައިޓްސް އެކްޝަން ޕްލޭނެއް އެކުލަވާލުމުގެ މަސައްކަތް ސަރުކާރުން ދަނީ ކުރަމުން،" މިނިސްޓަރު ވިދާޅުވި އެވެ.
މިރޭގެ ޖަލްސާގައި އިންސާނީ ހައްގުތައް ރައްކާތެރިކުރުމަށް އެކި ގޮތްގޮތުން އެހީތެރިވެފައިވާ ފަރާތްތަކަށް ވަނީ ހަނދާނީ ލިއުން ދީފަ އެވެ. މިއަދަކީ ރާއްޖޭގައި އިންސާނީ ހައްގުތައް ހިމާޔަތް ކުރުމުގެ ސަގާފަތެއް ގާއިމް ކުރުމުގެ މަސައްކަތް ހިއުމަން ރައިޓްސް ކޮމިޝަނުން ފެށިތާ 40 އަހަރު ފުރޭ ދުވަހެވެ.