މެލޭޝިޔާގެ ބޮޑުވަޒީރު ނަޖީބުއްރައްޒާގު އަންނަ އަންގާރަ ދުވަހު ރާއްޖެ ވަޑައިގަންނަވަން ހަމަޖެހިއްޖެ އެވެ.
ރައީސް އޮފީހުގެ ސުޕޯކްސްޕާސަން އިބްރާހިމް މުއާޒް އަލީ ކުރެއްވި ޓްވީޓެއްގައި ވިދާޅުވީ، ރައީސް އަބުދުﷲ ޔާމީން އަބުދުލްގައްޔޫމް އަދި ފަސްޓްލޭޑީ މެޑަމް ފާތުމަތު އިބްރާހީމްގެ ދައުވަތަކަށް މެލޭޝިޔާގެ ބޮޑުވަޒީރު ނަޖީބުއްރައްޒާގާއި އެމަނިކުފާނުގެ އަނބިކަނބަލުން ރަސްމީ ދަތުރުފުޅެއްގައ ދެ ދުވަހުގެ މުއްދަތަކަށް ރާއްޖެ އައުމަށް ހަމަޖެހިފައިވާ ކަމަށެވެ.
މުއާޒް އަލީ ވިދާޅުވީ، މި ދަތުރުފުގައި ދެގައުމުގެ ދެމެދުގެ ގުޅުން އިތުރަށް ބަދަހި ކުރުމަށް ކުރެވެންހުރި ކަންކަމާގުޅޭ ގޮތުން މަޝްވަރާ ކުރެވިގެންދާނެ ކަމަށެވެ. އަދި އެމްއޯޔޫ ތަކެއްގައި ސޮއި ކުރުމަށްވެސް ހަމަޖެހިފައިވާ ކަމަށް މުއާޒް ވިދާޅުވި އެވެ.
މީގެ ކުރިން ރައީސް އަބްދުﷲ ޔާމީން ވަނީ، މިދިޔަ އަހަރުގެ މާޗް މަހުގެ ތެރޭގައި އެ ގައުމަށް ރަސްމީ ދަތުރުފުޅެއް ކުރައްވައި ދެ ގައުމުގެ މެދުގައި ރަސްމީ ވާހަކަތައް ބާއްވައިފަ އެވެ. އަދި އެ ދަތުރުފުޅުގައި ރައީސް ވަނީ ނަޖީބުއްރައްޒާގު ރާއްޖެ ވަޑައިގަތުމަށް ދައުވަތު ދެއްވައިފަ އެވެ. އެ ދައުވަތު ބޮޑުވަޒީރު ގަބޫލު ކުރެއްވި ކަމަށް ވެސް ރައީސް ވަނީ އޭރު ވިދާޅުވެފަ އެވެ.