ދިވެހި ކިޔަވާކުދިންނަށް ޚާއްސަކޮށްގެން "ދަރިވަރުންގެ ދިވެހި ރަދީފް"ގެ ނަމުގައި ދިވެހި ބަހުގެ އެކެޑަމީން ތައްޔާރުކުރިި ދިވެހި ބަސްފޮތް އެޑިޔުކޭޝަން މިނިސްޓަރު ޑރ. އާއިޝަތު ޝިހާމް މިއަދު އިފްތިތާހުކޮށްދެއްވައިފި އެވެ.
ދަރިވަރުންގެ ދިވެހި ރަދީފް އިފްތިތާހު ކުރަން ޑިޕާޓްމަންޓް އޮފް ހެރިޓޭޖްގައި ބޭއްވި ރަސްމިއްޔާތުގައި މި ފޮތް އިފްތިތާހުކޮށްދެއްވުމަށްފަހު މިނިސްޓަރު ވިދާޅުވީ މިއަދު އިފްތިތާހު ކުތރި ބަސްފޮތަކީ "އުންމީދެއްގެ ފެށުން" ކަމަށެވެ.
"އުންމީދީ ހުޅުކޮޅެއް ހުޅުދާންވި އުޖާލާ އަލި. މިނޫރުން ދަރިވަރުންގެ ހިތްތައް އަލިވާނެ. ބަހުގެ ހުނަރު ގަދަވާނެ. ބަހުގެ ބަސްކޮށާރަށް ކުދިން އަހުލުވެރިވުމުގެ އިތުރަށް ބަހުގެ ޤާބިލްކަން އިތުރުވާނެ. ކުދީން ބަހަށްދޭ ސަމާލުކަމާއި ދިވެހިބަހަށް ކުދީންކުރާ ގަދަރު ބޮޑުވާނެ. މީގެ ނަތީޖާއެއްގެ ގޮތުން ކުދިންގެ ޢިބާރާތް ކުރުމުގެ ފެންވަރާއި އާ ލަފުޒަށް އަހުލުވެރިވުމަށާއި ދިވެހިބަހުން ލިޔެއުޅުމުގެ މަގުތައް ފަސޭހަވެ ތަނަވަސްވާނެ،" މިނިސްޓަރު ވިދާޅުވި އެވެ.
އިތުރަށް ވާހަކަފުޅު ދައްކަވަމުން އެކަމަނާ ވިދާޅުވީ ބަސްފޮތަކީ ކޮންމެ ބައެއްގެ ވެސް މުހިންމު ތަރިކައެއްކަމަށާ، ކޮންމެ ކިޔަވާކުއްޖެއްގެ އަތްމަތިގައި އޮންނަންޖެހޭ މުހިންމު ވަސީލަތެއްކަމަށެވެ.
"ރަދީފުން އަޅުގަނޑުމެންނަށް އެނގެނީ އަޅުގަނޑުމެންގެ ބަހުގެ މުއްސަނދިކަން. ރަދީފުން އަޅުގަނޑުމެންނަށް ބަޔާންކޮށްދެނީ އަޅުގަނޑުމެންގެ ބަހުގެ މިވެނިއެވެނިލަފުޒެއްގެ ހާލަތާއި އޭގެ މާނަ. ބަސް ކިޔަވާ ކުދިންނަށާއި ބަހުގެ އަހުލުވެރީންނަށް ބަސްފޮތަކީ ބޭނުން ހުރި މާނައިން ފުރިގެންވީ އެއްޗެއް،" މިނިސްޓަރު ވިދާޅުވި އެވެ.
ދިވެހި ކިޔަވާކުދިންނަށް ފަސޭހައިން ބޭނުންކުރެވޭ ގޮތަށް ތައްޔާރުކޮށްފައިވާ މި ރަދީފްގައި 10721 ލަފްޒުގެ މާނަ ހިމަނާފައިވެ އެވެ.
މި ބަސްފޮތަކީ ގައުމީ ބަހަށް އިސްކަންދިނުމުގެ ގާނޫނާ ގުޅިގެން ދިވެހިބަސް ކުރިއަރުވައި އާލާކުރުމަށް 2011 ވަނައަހަރު އުފެއްދި ދިވެހިބަހުގެ އެކެޑަމީން ތައްޔާރުކޮށްފައިވާ ރަދީފެކެވެ.