އަތޮޅުތަކުގައި ކަރަންޓާއި ފެނުގެ ހިދުމަތްދޭ ކުންފުނި ފެނަކަ ކޯޕަރޭޝަނުގެ ހިންގުން މުހައްމަދު ލަމްއާނާ ހަވާލުކޮށްފިއެވެ.
ފެނަކަ ކޯޕަރޭޝަނުން މިއަދު ބުނީ ކުންފުނި ހިންގަން ލަމްއާނާ ހަވާލުކުރީ އެކްޓިން މެނޭޖިން ޑިރެކްޓަރެއްގެ ގޮތުގައި ކަމަށެވެ. އޭނާއަށް ކުންފުނި ހިންގުން ހަވާލުކުރީ ޑެޕިއުޓީ މެނޭޖން ޑިރެކްޓަރުގެ މަގާމު އުފައްދައި އެމަގާމަށް ހަމަޖެއްސުމަށް ފަހުގައި ކަމަށް ވެސް ބުންޏެވެ. އެގޮތަށް ނިންމީ ޑިރެކްޓަރުންގެ ބޯޑުންނެވެ.
ލަމްއާނަކީ ރައީސުލް ޖުމްހޫރިއްޔާ އަބުދުﷲ ޔާމީނު އަބުދުލް ގައްޔޫމުގެ އަނބިކަނބަލުން ފާތުމަތު އިބުރާހީމްދީދީ ހިންގަވާ ސަދަގާތު ފައުންޑޭޝަންގައި ކުރިން އިސްކޮށް އުޅުއްވި ބޭފުޅެކެވެ. އޭނާ އަކީ ކުރިން މިފްކޯގައި ވެސް މަސައްކަތްކުރެއްވި ބޭފުޅެކެވެ.
ފެނަކައިގެ މެނޭޖިން ޑައިރެކްޓަރަކަށް ކުރިން ހުންނެވީ މިހާރު އިލެކްޝަން ކޮމިޝަނުގެ ރައީސް އަހުމަދު ޝަރީފެވެ. އޭނާ އިލެކްޝަން ކޮމިޝަނަށް އައްޔަން ކުރުމުން ފެނަކަ ހިންގަން ހަވާލު ކުރީ އެމްޕީއެލްގެ ސީއީއޯ އިބުރާހީމް އަބްދުއްރައްޒާގް ހަލީމާއެވެ.
އެމްޕީއެލްގެ ސީއީއޯގެ މަގާމާ މިދިޔަ އަހަރުގެ މާޗް މަހު ހަލީމް ހަވާލުވެވަޑައިގެންނެވީ ހަލީމަކީ ކުރިން އެމްޓީސީސީގެ ސީއީއޯގެ މަގާމާއި އެމްއާރުޑީސީގެ މެނޭޖިން ޑިރެކްޓަރުކަން ވެސް ކުރިން ކުރައްވާފައިވާ ތަޖުރިބާކާރު ބޭފުޅެކެވެ.