ދެމެހެއްޓެނިވި ތަރައްގެ ދާއިރާއިން ކޮށްފައިވާ ތަޖުރިބާ ހިއްސާކުރުމަށް މާޗް 30 އިން އޭޕްރިލް 2 އަށް ސަރުކާރުން ބޭއްވި ވޯކްޝޮޕްގައި ބައިވެރިވެވަޑައިގެންނެވުމަށް ދައުވަތު ދީގެން ވަޑައިގެންނެވި ބޭރުގައުމުތަކުގެ ސަފީރުންނާ ރައީސުލް ޖުމްހޫރިއްޔާ އަބުދުﷲ ޔާމީނު އަބުދުލް ގައްޔޫމު ބައްދަލުކުރައްވައިފިއެވެ.
ރައީސް އޮފީހުން ބުނީ ރައީސް ޔާމީނު ސަފީރުންނާ ބައްދަލުކުރެއްވީ މިއަދު ހެނދުނު ރައީސް އޮފީހުގައި ކަމަށެވެ.
ބައްދަލުވުމުގައި ސަފީރުންނާ ދެއްކެވި ވާހަކަފުޅުގައި ވިދާޅުވީ ރާއްޖޭން ކަނޑައަޅާފައިވާ ތަރައްގީގެ ލަނޑުދަނޑިތައް ހާސިލުކުރުމަށް މަސައްކަތް ކުރާނީ ދެމެހެއްޓެނިވި ގޮތަކަށް ކަމަށެވެ. އެގޮތުން ރާއްޖޭގައި މަޝްރޫއުތައް ހިންގަނީ މޫސުމަށް އަންނަ ބަދަލުތަކުން ލިބޭ ގެއްލުންތައް ކުޑަ ކުރެވޭ ގޮތަށް ކަމަށް ހެދުމަށް ސަރުކާރުން މަސައްކަތް ކުރާ ކަމަށެވެ. އެގޮތުން މަޝްރޫއުތައް ޕްލޭންކުރުމާއި ކުރިއަށް ގެންދިއުމުގައި ވެސް އެކަމަށް ރިއާޔަތް ކުރާ ކަަމަށް ވެސް ރައީސް ވިދާޅުވިއެވެ.
ތަރައްގީގެ ދާއިރާއިން ރާއްޖެއަށް ކުރިމަތިވެފައިވާ ގޮންޖެހުންތަކުގެ މައުލޫމާތުވެސް ބައްދަލުވުމުގައި ރައީސް ޔާމީނު ސަފީރުންނާ ހިއްސާކުރެއްވިއެވެ.
ބައެއް ގައުމުތަކުގެ ސަފީރުން ރާއްޖެއަށް ވަޑައިގެންނެވީ ދެމެހެއްޓެނިވި ގޮތަކަށް ތަރައްގީ ކުރުމާ ބެހޭ ގޮތުން މަޝްވަރާކޮށް ހިޔާލު ބަދަލުކުރުމަށް ފޮރިން މިނިސްޓްރީން އިންތިޒާމްކުރި ސަފީރުންގެ ދެވަނަ ބައްދަލުވުމުގައި ބައިވެރިވަޑައިގެންނެވުމަށެެވެ. އެ ބައްދަލުވުމަށް ވަޑައިގެންނެވި ގައުމުތަކުގެ ތަފުސީލެއް ނޭނގެއެވެ. ނަމަވެސް ފޮރިން މިނިސްޓްރީން ކުރިން ބުނެފައި ވަނީ ޒިމްބާބްވޭ، ޒެމްބިއާ، ނައިޖީރިއާ، ޖޯޖިއާ އަދި އަލްބޭނިއާ ފަދަ ގައުމުތަކުން އދ. އަށް ކަނޑައަޅާފައިވާ ސަފީރުން އެ ބައްދަލުވުމުގައި ބައިވެރިވަޑައިގެންނެވި ކަމަށެވެ.