ގާނޫނީ ދާއިރާގެ އަގު ވެއްޓޭ ފަދަ ކަމެއް ގާނޫނީ ވަކީލުން ކޮށްގެން ނުވާނެ ކަމަށް ސުޕްރީމްކޯޓުގެ ފަނޑިޔާރު އަބުދުﷲ އަރީފު ވިދާޅުވެއްޖެއެވެ.
ވަކާލާތު ކުރުމުގެ ހުއްދަ އަލަށް ލިބިވަޑައިގެންނެވި 175 ވަކީލަކު ހުވާކުރެއްވުމަށް ދަރުބާރުގޭގައި ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުން އަރީފު ވިދާޅުވީ މަސައްކަތުގެ ދާއިރާއާއި އަމިއްލަ ދިރިއުޅުމުގައި ވެސް ސުލޫކީ މިންގަނޑުތަކަށް ވަކީލުން އިހުތިރާމްކުރުން ވަރަށް މުހިއްމު ކަމަށެވެ.
" ގާނޫނީ ވަކީލުން މަސައްކަތްކުރަންވާނީ މިނިވަން އަދި މުއްސަތިގިއްލު ޕްރޮފެޝަނެއްގެ ގޮތުގައި. ގާނޫނީ ވަކީލުން އެމީހުންގެ ޕްރޮފެޝަނުގެ އަގު ވެއްޓޭ ކަހަލަ ނުވަތަ އިތުބާރު ގެއްލޭ ފަދަ އެއްވެސް ކަމެއް ކޮށްގެންނުވާނެ،" އަލަށް ހުވާ ކުރެއްވި ވަކީލުންނަށް ނަސޭހަތް ދެއްވަމުން އަރީފު ވިދާޅުވިއެވެ.
އޭެނާ ވިދާޅުވީ ދައުލަތުގެ މުއައްސަސާތަކުގެ ހުރުމަތާއި ގަދަރު ހިފަހައްޓަންވެސް ވަކީލުން މަސައްކަތް ކުރަން ޖެހޭނެކަމަށާއި މަސްލަހަތު ފުށޫ އަރާ ފަދަ ގޮތަކަށް އެއްވެސް ހާލެއްގައި މަސައްކަތްކޮށްގެން ނުވާނެ ކަމަށެވެ. މުވައްކިލުންގެ ހައްގުތަކަށް ރައްކާތެރިވެ އިޚުލާސްތެރިކަމާ އެކުގައި މަސައްކަތް ކުރުމަަށް ވެސް ވަކީލުންނަށް އަރީފު އިލްތިމާސްކުރެއްވިއެވެ. ހައްގު ނޫން އެއްޗެއް ހޯދަން އުޅޭ ފަރާތެއްގެ އެހީތެރިއަކަށް ނުވުމަށް ވެސް އިލްތިމާސްކުރެއްވިއެވެ.
" ކުށްވެރިންގެ ކުށް ފޮރުވުމަަށްޓަކައި ޝަރީއަތަށް ހަގީގަތް އޮޅުވާލުމާ ތިމާއަށް ހައްގު ނޫން އެއްޗެއް ނުވަތަ ކަމެއް ލިބިގަތުމަށްޓަކައި އުޅޭ ފަރާތެއްގެ ހަގީގަތް އެނގިހުރެ އެފަދަ ފަރާތަކަށް އެކަމުގައި އެހީތެރިވުންކަމަށް ވާގޮތަށް އެއްވެސް ކަހަލަ ކަމެއް ކޮށްގެން ނުވާނެ،" އޭނާ ވިދާޅުވިއެވެ.
ރޭގެ ރަސްމިއްޔާތުގައި ބަންޑާރަނައިބު މުހައްމަދު އަނިލްވެސް ވަކީލުންނާ މުހާތަބު ކުރެއްވިއެވެ.
އޭނާ ވިދާޅުވީ ގާނޫނީ ވަކީލުންނަށް ރާއްޖޭގައި ވަރަށް ގިނަ ފުރުސަތުތައް އެބަ އޮތް ކަމަށެވެ. އެގޮތުން ފާހަގަ ކުރެއްވީ ރާއްޖޭގެ މިނިވަން މުއައްސަސާތަކާއި ބަންޑާރަނައިބުގެ އޮފީހާއި ފުލުހުންގެ މުއަައްސަސާ ފަދަ ތަންތަނުގައި ވަކީލުންނަށް ގިނަ ފުރުސަތުތަކެއް އެބަ އޮތް ކަަމަށެވެ. ދައުލަތުގެ މުއައްސަސާތަކުގައި އޮތް އެފުރުސަތުތަކުގެ އިތުރުން އަމިއްލަ ލޯފާމްތަކުގައި ވެސް ގިނަ ފުރުސަތުތަކެއް އެބަ އޮތް ކަަމަށް ވެސް ވިދާޅުވިއެވެ. އަދި ވިދާޅުވީ އެހުރިހާ ފުރުސަތަކާ އެކުގައި ވެސް މިހާރު އެއީ ވާދަވެރިކަން ބޮޑު ދާއިރާއެއް ކަމަށާއި އެހެންވީމާ އިތުރު ތައުލީމާއި ތަމްރީނު ހޯއްދަވަން އަބަދުވެސް މަސައްކަތް ކުރަން ޖެހޭނެ ކަމަށެވެ.