ސައުދީ އަރަބިއްޔާގައި ދިރިއުޅޭ ޝީއީންނާ ދެކޮޅަށް އިއްޔެ ދިން ޖާނުން ފިދާވުމުގެ ވަރުގަދަ ހަމަލާގެ ޒިންމާ އިސްލާމިކް ސްޓޭޓް (އައިއެސް) އިން ނަގައިފި އެވެ. އެއީ ތެދަކަށް ވެއްޖެ ނަމަ، މިއީ މިދިޔަ ނޮވެމްބަރު މަހު ގާއިމްކުރި އައިއެސްގެ ސައުދީ ގޮފިން ދިން ފުރަތަމަ ހަމަލާ އެވެ.
ސައުދީގެ ރަސްމީ ޓީވީން ބުނި ގޮތުގައި އުތުރު ޕްރޮވިންސްގެ ކުޑަ އަވަށެއް ކަމަށްވާ އަލްގަދީހުގައި ހުންނަ އިމާމް އަލީ މިސްކިތަށް ހުކުރު ވަގުތު ދިން ހަމަލާގައި 21 މީހުން މަރުވެ، 80 އަށް ވުރެ ގިނަ މީހުން ޒަހަމްވެފައިވެ އެވެ. ޒަހަމްވި ބައެއް މީހުންގެ ހާލު ވަރަށް ސީރިއަސް ކަމަށް، އެ އަވަށުގެ ޑޮކްޓަރަކާ ހަވާލާދީ ބީބީސީން ބުންޏެވެ.
ސައުދީގެ އިންޓީރިއާ މިނިސްޓްރީގެ ތަރުޖަމާނު ނެރުއްވި ބަޔާނެއްގައި ވިދާޅުވި ގޮތުގައި ޖާނުން ފިދާވުމުގެ މި ހަަމަލާ ދީފައި ވަނީ ބޮން ހަރުުކޮށްފައި ހުރި ބެލްޓެއް އަޅާފައިވާ މީހަކު މިސްކިތް ތެރެއަށް ވަދެ، އެ ބޮން ގޮއްވާލައިގެންނެވެ. "އެތައް ބަޔަކު ޝަހީދުވެ، ޒަހަމްވި" މި ހަމަލާގެ ފަހަތުގައިވާ "ހުރިހާ ފަރާތްތައް ހޯދުމަށް ސަލާމަތީ ބާރުތަކުން ނުކުރާނެ ކަމެއް ނޯންނާނެ" ކަމުގެ ޔަގީންކަން އޭނާ ދެއްވި އެވެ.
އައިއެސް އިން މި ހަމަލާގެ ޒިންމާ ނަގާފައި ވަނީ ޓުވިޓާގަ އެވެ. ޖާނުން ފިދާވި ކަމަށް ބުނާ އެ ޖަމާއަތުގެ ހަނގުރާމަވެރިޔާ، އަބޫ އަމީރު އަލް ނަޖުދީގެ ފޮޓޯއާ އެކު ޝާއިއުކުރި ބަޔާނެއްގައި ބުނި ގޮތުގައި މި ހަމަލާ ދީފައި ވަނީ "ހިލާފަތުގެ ސިފައިން"ނެވެ. އަދި ކުރިއަށް އޮތީ ސައުދީގައި ދިރިއުޅޭ ޝީއީންނަށް "އަނދިރި ދުވަސްތަކެއް" ކަމުގެ އިންޒާރު ވެސް ދީފައިވެ އެވެ.
އައިއެސް އިން ގަބޫލުކުރާ ގޮތުގައި ޝީއީންނަކީ މުސްލިމުންނެއް ނޫނެވެ. އެހެންވެ، އެ ޖަމާއަތުން ހިފާފައިވާ ސީރިއާ އާއި އިރާގުގެ ސަރަހައްދުތަކުގައި އުޅޭ ޝީއީންނާ ދެކޮޅަށް ގެންދަނީ ލާއިންސާނީ އަމަލުތައް ހިންގަމުންނެވެ.
ސައުދީ އަކީ ސުންނީ މުސްލިމުންގެ މެޖޯރިޓީ އޮންނަ ގައުމަކަށް ވިޔަސް، އެ ގައުމުގައި ގިނަ އަދަދެއްގެ ޝީއީން ވެސް ދިރިއުޅެ އެވެ. އުތުރުގެ އަވަށްތަކުގައި އުޅޭ އެ މީހުންނާ ދެކޮޅަށް ހަމަލާ ދޭނެ ކަމުގެ އިންޒާރު އައިއެސް އިން ވަނީ ކުރިން ދީފަ އެވެ.
އިރާގާއި ސީރިއާގެ ބޮޑު ބައެއް ކޮންޓްރޯލް ކުރަމުންދާ އައިއެސް އިން ދައުވާކުރާ ގޮތުގައި އެ ޖަމާއަތުން ހިފާފައިވާ ސަރަހައްދުތަކަކީ އިސްލާމީ ހިލާފަތެކެވެ. އަދި އެ ޖަމާއަތުގެ ލީޑަރު އަބޫ ބަކުރު އަލް-ބަގުދާދީ ވަނީ އެ "ހިލާފަތަށް" ހިޖުރަކުރުމަށް ދުނިޔޭގެ ހުރިހާ ކަންކޮޅުތަކެއްގައި އުޅޭ މުސްލިމުންނަށް ގޮވާލާފަ އެވެ