މެލޭޝިއާގެ ކުރީގެ ބޮޑުވަޒީރު ނަޖީބު އަބުދުއް ރައްޒާގާ ގުޅުން ހުރި އެޕާޓްމަންޓްތަކެއް އެގައުމުގެ ފުލުހުން ގެންދިޔަ އަގުބޮޑު ދަބަސްތަކަކީ މީހުން ހަދިޔާއަށް ދީފައިވާ ތަކެތި ކަމަށާއި ގެންދިޔަ ފައިސާއަކީ ބަރީސާން ނެޝަަނަލްގެ ކެމްޕޭނަށް މީހުން ދީފައިވާ އެހީގެ ފައިސާ ކަމަށް ނަޖީބު ވިދާޅުވެއްޖެއެވެ.
ސްޓްރެއިޓްސް ޓައިމްސް ނޫހުން ބުނީ ގެންދިޔަ ފައިސާއައި ދަބަސްތަކާ ބެހޭ ގޮތުން ނަޖީބު މިމޭރުމުން ވާހަކަފުޅު ދައްކަވާފައި ވަނީ ފުލުހުންނަށް ހުށަހެޅުއްވި (ޝަކުވާގެ)ރިޕޯޓެއްގައި ކަމަށެވެ.
މެލޭޝިއާ ފުލުހުން މިއަދު ބުނީ ނަޖީބުގެ އެޕާޓްމަންޓްތައް ބަލައި ފާސްކުރުމަށް ފާއިތުވި ހަފުތާއެއްހާ ދުވަހު ހިންގި އޮޕަރޭޝަންތަކުގައި ހޯދުނު ފައިސާގެ އަދަދު 38.4 މިލިޔަން ޑޮލަރަށް އަރާ ކަމަށެވެ. މެލޭޝިއާ ފުލުހުންގެ ކޮމާޝަލް ކްރައިމް އިންވެސްޓިގޭޝަން ޑިޕާޓްމަންޓުގެ ވެރިޔާ އަމަރު ސިންގް މިއަދު ވިދާޅުވީ ނަޖީބުގެ އެޕާޓްމަންޓްތަކުން ފައިސާ އަޅާފައި ހުރި 35 ދަބަސް ހޯދިފައިވާ ކަމަށެވެ. އަދި ވިދާޅުވީ އެ ދަބަސްތަކުގައި ދުނިޔޭގެ 26 ގައުމެއްގެ ފައިސާގެ ނޫޓުތައް ހުރި ކަމަށެވެ.
މެލޭޝިއާ ފުލުހުން ހިންގި ބަލައި ފާސްކުރުމުގެ އޮޕަރޭޝަންތަކުގައި ޖުުމްލަ 72 ދަބަސް ހޯދިއެވެ. އޭގެ ތެރެއިން ބައެއް ދަބަސްތަކުގައި ހުރީ އަގުބޮޑު އަތްދަބަސްތަކެވެ.
މެލޭޝިއާގެ ބޮޑުވަޒީރު ނަޖީބު ރައްޒާގުގެ ގެ ބަލައި ފާސްކުރުމަށް ފަހު ފުލުން ނެރުނު ފޮށިތަކެއް ގެންދަނީ. ފޮޓޯ: ސްޓްރެއިޓްސް ޓައިމް