މިނިވަން 50 ފާހަގަ ކުރުމުގެ ހަރަކާތްތަކުގައި ބައިވެރި ނުވާން އއ އަތޮޅު ކައުންސިލުން ފާސްކުރި ގަރާރަށް އެ ކައުންސިލްގެ މެންބަރަކު ތާއީދުކޮށްފައި ވާތީ މުސާރަ އާއި އިނާޔަތްތައް ނުލިބޭ ގޮތަށް އޭނާ ސަސްޕެންޑް ކުރުމަށް ލޯކަލް ގަވަރުމެންޓް އޮތޯރިޓީ(އެލްޖީއޭ) އިން ނިންމައިފި އެވެ.
އެލްޖީއޭ އިން މިއަދު ނެރުނު ބަޔާނެއްގައި ބުނީ، އެ ގަރާރާ ގުޅޭ ގޮތުން ހުށަހެޅުނު މައްސަލަ ތަހުގީގު ކުރުމަށް އެކުލަވާލި ކޮމިޓީ އިން ނިންމީ އއ އަތޮޅު ކައުންސިލްގެ މެންބަރު އަލީ ސަމީރު އެއް މަސްދުވަހަށް ސަސްޕެންޑް ކުރުމަށް ކަމަށެވެ. އަދި އެ މުއްދަތުގައި އޭނާއަށް މުސާރަ އާއި އެއްވެސް އެލަވަންސެއް ނުލިބޭ ގޮތަށް ވަނީ ނިންމައިފަ އެވެ.