ރިޔާސީ އިންތިހާބާއި ގުޅޭ ހަރަކާތެއް ހިންގުމަށް ހަ ދުވަހަށް އާޓިފިޝަލް ބީޗް ދޫކޮށްދޭން އެމްޑީޕީން އެދިއްޖެ އެވެ.
އެމްޑީޕީން ހައުސިން މިނިސްޓަރު ޑރ. މުހައްމަދު މުއިއްޒުއަށް ފޮނުވި ސިޓީއެއްގައި ބުނެފައިވަނީ 23 ސެޕްޓެމްބަރު 2018 ގައި ބާއްވާ ރިޔާސީ އިންތިހާބުގައި ވާދަ ކުރުމަށް އެމްޑީޕީއާއި، ގުޅިފައިވާ ސިޔާސީ ޕާޓީތަކުން ހުށަހެޅި ކެނޑިޑޭޓް އިބްރާހިމް މުހައްމަދު ސޯލިހުގެ ކެނޑިޑެސީ އިލެކްޝަންސް ކޮމިޝަނުން ބަލައިގަނެފައިވާ ކަމަށެވެ.
އަދި ހުރިހާ ކެނޑިޑޭޓުންނަށްވެސް ހަމަހަމަކަމާއި، އިންސާފުވެރިކަމާއެކު ކެމްޕެއިން އަދި ސިޔާސީ ހަރަކާތް ހިންގުމަށް ފުރުސަތު ލިބޭނެ ކަމުގެ ޔަގީންކަން ސަރުކާރުންނާއި އިލެކްޝަންސް ކޮމިޝަނުން ދީފައިވާ ކަމަށާއި، އެހެން ކަމުން ރިޔާސީ އިންތިހާބާއި ގުޅޭ ކެމްޕެއިން ހަރަކާތެއް ބޭއްވުމަށްޓަކައި މި މަހުގެ 13، 14، 15، 20، 21 އަދި 22 ވަނަ ދުވަހުގެ ހެނދުނު 6:00 އިން ފެށިގެން މެންދަމު 12:00 އަށް އާޓިފިޝަލް ބީޗު ލިބޭނެ ގޮތް ހަދައިދިނުން އެދޭކަމަށް އެސިޓީގައި ވަނީ ބުނެފައެވެ.
ރިޔާސީ އިންތިހާބުގެ ކެމްޕެއިނަށް ހަމަ ހަމަ ފުރުސަތު ނުލިބޭކަމަށް ބުނެ، އިދިކޮޅު ފަރާތްތަކުން ދަނީ ކެނޑިނޭޅި ޝަކުވާކުރަމުންނެވެ. އެގޮތުން ފުލުހުންނާއި ސަރުކާރުގެ ބައެއް އިދާރާތަކުން ކެމްޕެއިނަށް ހުރަސްއަޅާ ކަމުގެ ތުހުމަތު އިދިކޮޅު ފަރާތްތަކުން އަންނަނީ ކުރަމުންނެވެ.