މިދިޔަ ރިޔާސީ އިންތިހާބު ކާމިޔާބު ކުރެއްވި އިބްރާހިމް މުހައްމަދު ސޯލިހު (އިބޫ)ގެ ސަރުކާރާއެކު ގުޅުން ވަރުގަދަކޮށް، ބަދަހި ކުރަން ބޭނުންވާ ކަމަށް އެމެރިކާގެ ވައިޓް ހައުސްގައި އޮންނަ އެ ގައުމުގެ ސަލާމަތީ ކަންކަމާ ބެހޭ ކައުންސިލުން ބުނެފި އެވެ.
ވައިޓް ހައުސްގެ ސަލާމަތާ ބެހޭ ކައުންސިލްގެ ރަސްމީ ޓްވިޓާ އެކުއުންޓުން މިއަދުކޮށްފައިވާ ޓްވީޓެއްގައި ބުނެފައި ވަނީ އިބޫ ހޯދި ބޮޑު ކާމިޔާބީއަށް މަރުހަބާ ކިޔާ ކަމަށާއި ދިވެހި ރައްޔިތުންގެ ބަސް ބުނެފައިވާ ކަމަށެވެ. އަދި ދިފާއީ ކަންކަމާއި އަމާންކަމާއި ޑިމޮކްރަސީ ކުރިއެރުވުމަށްޓަކައި އާ ސަރުކާރާއެކު ގުޅުން ވަރުގަދަ ކުރުމަށް ބޭނުންވާ ކަމަށް އެ ޓްވީޓުގައި ބުނެފައިވެ އެވެ.
އިބޫ އިންތިހާބުވުމާ ގުޅިގެން ބޮޑެތި ގައުމުތަކުން ވަނީ މަރުހަބާ ކިޔާ ގުޅުން ބަދަހި ކުރަން ބޭނުންވާކަން ހާމަކޮށްފަ އެވެ. އެގޮތުން ސައުދީ އާއި ޗައިނާ އިން ވެސް ދާދި ފަހުން ވަނީ އިބޫއަށް މަރުހަބާ ކިޔައި ގުޅުން ބަދަހި ކުރުމުގެ ވާހަކަތައް ދައްކައިފަ އެވެ.