ނަފްސާނީ މައްސަލަތަކެއް ހުންނަ އަންހެނަކު ހުޅުމާލޭ ފްލެޓެއްގެ ދެވަނަ ބުރިން ބިން މައްޗަށް ފުންމާލަން އުޅެނިކޮށް ސިފައިން ސަލާމަތްކޮށްފި އެވެ.
އެ އަންހެން މީހާ ހުޅުމާލޭ ފްލެޓެއްގެ ކުޑަ ދޮރު މަތިން ބޭރަށް އިންނަ ޝީޓު މަތީ އިނދެ، ވާހަކަތަކެއް އަޑުގަދަކޮށް ގޮވަމުންދާ މަންޒަރު ފެންނަ ވީޑިއޯއެއް މިއަދު ހެނދުނު ވަނީ އާންމުވެފަ އެވެ. އެ އަންހެން މީހާ ދައްކަމުން ދިޔައީ ކުއްޖަކަށް ލިބޭ އަނިޔާއެއްގެ ވާހަކަ އެވެ. ނަމަވެސް ވީޑިއޯއިން އެ ވާހަކަތައް ސާފެއް ނުވެ އެވެ.
އެމްއެންޑީއެފްގެ އިންފޮމޭޝަން އޮފިސަރު އިބްރާހިމް އާޒިމް ވިދާޅުވީ އެމީހާ ރައްކާތެރިކަމާއެކު ސަލާމަތްކޮށްފައިވާ ކަމަށެވެ. އޭނާ ސަލާމަތް ކުރީ 8:40 ހާއިރު އެވެ.
އާޒިމް ވިދާޅުވި ގޮތުގައި އެމީހާ ސަލާމަތްކުރީ ހަރުގަނޑެއް ބަހައްޓައިގެން ކުޑަ ދޮރާ ހަމައަށް އެރުމަށްފަހު ކުޑަ ދޮރުން ފްލެޓް ތެރެއަށް ވައްދައިގެންނެވެ. އެ ވަގުތު ގަދަ ހެދުމަށް އޭނާ އެއްވެސް މަސައްކަތެއް ނުކުރާ ކަމަށް ވެސް ވިދާޅުވި އެވެ.
އެ މައްސަލަ ފުލުހުން ގެންދަނީ ތަހުގީގު ކުރަމުންނެވެ.