ކުރިޔަށް އޮތް ރައްޔިތުން މަޖިލީހުގެ އިންތިހާބުގައި ގިނަ ގޮނޑި ކާމިޔާބު ކުރާނީ ޕީޕީއެމާއި ޕީޕަލްސް ނޭޝަނަލް ކޮންގްރެސް ޕާޓީ ގުޅިގެން ކަމަށް ކޮންގްރެސް ޕާޓީގެ ވަގުތީ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ކޮންގްރެސް ޕާޓީ އިފްިތިތާހު ކުރަން މިރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ ކޮންގްރެސް ޕާޓީ އާއި ޕީޕީއެމް މަސައްކަތް ކުރާނީ އެކުގައި ވަރަށް ބޮޑަށް ގުޅިގެން ސާބިތުކަމާއެކުގައި ކަމަށެވެ. އެ ދެ ޕާޓީ އެކުވުމުން އުފެދެނީ ގައުމު ސަލާމަތް ކުރާނެ ލަޝްކަރެއް ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވީ ކުރިޔަށް އޮތް ރައްޔިތުންގެ މަޖިލީހުގެ އިންތިހާބުގައި ވެސް ދެ ޕާޓީ ވާދަ ކުރާނީ އެކުގައި ކަމަށާއި މަޖިލީހުގެ ގިނަ ގޮނޑި ދެ ޕާޓީ ގުޅިގެން ނަގާނެ ކަމަށެވެ.
"ޕާޓީގެ މައިގަނޑު މަގްސަދުގެ ތެރޭގައި މިއޮތީ ޕާޓީގެ [ރާއްޖޭ] ޒައާމަތާ ހަވާލުވުމުގެ މަސައްކަތް، އިރާދަކުރެއްވިއްޔާ މިހާރު މިއޮތް ސަރުކާރު ޖަވާބު ދާރީ ކުރުވުމާއެކީގައި ދެން އަންނަ ރިޔާސީ އިންތިހާބެއްގައި މި ޕާޓީން ރާއްޖޭގެ ވެރިކަމާ ހަވާލުވާނެ،" އަބްދުއްރަހީމް ވިދާޅުވި އެވެ. "އިރާދަކުރެއްވިއްޔާ ކުރިމަތިވަމުންް މި އަންނަނ ރައްޔިތުން މަޖިލީހުގެ އިންތިހާބުގައި ވެސް ކޮންގްރެސް ޕާޓީ އާއި ޕީޕީއެމް ގުޅިގެން މަޖިލީހުގެ ގިނަ ގޮނޑިތަކެއް ކާމިޔާބު ކުރާނެ ކަމުގެ އުންމީދު އޮތް ކަމަށް ދަންނަވަން،"
އަބްދުއްރަހީމް ވިދާޅުވީ ކޮންގްރެސް ޕާޓީއަކީ ރައީސް އަބްދުﷲ ޔާމީންގެ އިސްނެންގެވުމާއި ލަފާފުޅުގެ ދަށުން އުފެއްދެވި ޕާޓީއެއް ކަމަށެވެ. ކޮންގްރެސް ޕާޓީގެ ފިކުރަކީ ރައީސް ޔާމީންގެ ފިކުރު ކަމަށާއި ޕާޓީން ދަމަހައްޓާނީ ވެސް ރައީސް ޔާމީންގެ ސިޔާސަތުތައް ކަމަށެވެ.
ޕާޓީގެ މިލްކުވެރިކަމާމެދު ސުވާލު އުފައްދާ ކޯޓަށް ދާނެ މީހަކު ނުހުންނާނެ ކަމަށާއި އެ ޕާޓީގެ މިލްކުވެރި ފަރާތަކީ ވެސް ރައީސް ޔާމީން ކަމަށް އަބްދުއްރަހީމް ވިދާޅުވި އެވެ. -- ރައީސް ޔާމީން އެ ޖަލްސާގައި ވަޑައިގެން އިންނެވީ ވެސް ކޮންގްރަސް ޕާޓީގެ ވިލު ނޫ ކުލައިގެ ޓައި އެއް ތުރުކުރައްވައިގެނެވެ.
"މި ޕާޓި އުފައްދަން މަސައްކަތް ކުރަން ޖެހުނު ސަބަބަކީ ޕީޕީއެމްގެ މިލްކުވެރި ފަރާތަކީ ކޮބައިކަން ނޭނގި ދުވަސްތަކެއް ހޭދަވާން ފެށުމާއެކީގައި އަޅުގަނޑުމެންނަށް މަޖުބޫރުވީ މިއަދު މިއޮތް ސަރުކާރުން ޖަވާބުދާރީ ކުރުވާނެ އާ ވިސްނުމެއް ހޯދަން، އެކަން ކުރެވެން އޮތީ ޕާޓި އުފައްދައިގެން ކަމަށް ރައީސް ޔާމީންއަށް ފެނިވަޑައިގެން ހިނދު އެމަނިކުފާނުގެ ލަފަޔާއެކު އެ މަސައްކަތް ފެށީ، މި ޕާޓީއާ ގުޅިވަޑައިގަތް ކޮންމެ ބޭފުޅަކު ގުޅިވަޑައިގަތީ ރައީސް ޔާމީންގެ ފިކުރަށް ތާއީދު ކުރައްވަން،" އަބްދުއްރަހީމް ވިދާޅުވި އެވެ.
ކޮންގްރެސް ޕާޓީގެ މަގްސަދަކީ ރާއްޖޭގައި އިސްލާމް ދީން ދެމެހެއްޓުން ކަމަށާއި މިނިވަންކަމާއި ސިޔާދަތު ހިފެހެއްޓުން ކަމަށް އަބްދުއްރަހީމް ވިދާޅުވި އެވެ. އަދި ގައުމު ތަރައްގީ ކުރުމަށާއި އިސްލާމް ދީން ދަމަހައްޓަން ކުރަން ޖެހޭ ކޮންމެ ކަމެއް ކުރާނެ ކަމަސް އަބްދުއްރަހީމް ވިދާޅުވި އެވެ. އަދި އެކަން ކުރެވޭނީ ރައީސް ޔާމީންގެ ފިކުރު އޮންނަ ޕާޓީތަކަށް ކަމަށް ވެސް އޭނާ ވިދާޅުވި އެވެ.