ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހައްޔަރު ކުރަން ކުރިމިނަލް ކޯޓުން ނެރުނު އަމުރުގެ އިސްތިއުނާފު އަޑުއެހުންތައް މާދަމާ ހައިކޯޓުގައި ފެށުމަށް ތާވަލުކޮށްފި އެވެ.
ހައިކޯޓުން އެ މައްސަލަ ތާވަލްކޮށްފައިވަނީ މާދަމާ ހެނދުނު 10:00 އަށެވެ.
ރައީސް ޔާމީން ޝަރީއަތް ނިމެންދެން ބަންދުކޮށްފައި ވަނީ އެމަނިކުފާނުގެ މައްޗަށް ތުހުމަތުކޮށްފައިވާ ލޯންޑްރީ މައްސަލާގަ އެވެ. އެ މަނިކުފާނު ބަންދު ކުރަން އަމުރު ނެރުނީ އެކަމަށް ޕްރޮސިކިއުޓާ ޖެނަރަލްގެ ފަރާތުން ކޯޓުގައި އެދިގެނެވެ.
ޕްރޮސިކިއުޓާ ޖެނަރަލްގެ ފަރާތުން ފާހަގަކޮށްފައިވާ ގޮތުގައި ރައީސް ޔާމީން ގެންދަވަނީ މައްސަލާގައި ހިމެނޭ ފަރާތްތަކަށް ނުފޫޒު ފޯރުވަމުންނެވެެ. ހެކިންނަށް ފައިސާ ދީގެން ރިޝްވަތު ހުށަހަޅާފައިވާ ކަމަށް ވެސް ބުނެފައިވެ އެވެ.
އެ ތުހުމަތުތައް ރައީސް ޔާމީން ދޮގު ކުރައްވަ އެވެ. އެކަމަކު، ޕްރޮސިކިއުޓާ ޖެނަރަލްގެ ވާހަކަތަކަށް ބާރު ދިނުމަށް ބައެއް ލިޔެކިޔުންތައް ވެސް ހުށަހަޅާފައިވާތީ، ކުރިމިނަލް ކޯޓުގެ އިސް ގާޒީ އަހުމަދު ހައިލަމް ވަނީ ރައީސް ޔާމީންގެ ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފަ އެވެ.
އެމަނިކުފާނު ބަންދު ކޮށްފައިވަނީ މާފުށީ ޖަލުގެ ހާއްސަ ޔުނިޓެއްގަ އެވެ. ބަންދުކުރި ފަހުން ތިން ފަހަރެއްގެ މަތިން އައިޖީއެމްއެޗްގައި އެޑްމިޓްކޮށްފައިވެ އެވެ. އެޑްމިޓްކުރީ ހިތުގެ އާލާސްކަންފުޅަކާ ގުޅިގެންނެވެ. އެމަނިކުފާނު ބަންދުކުރުމުގެ ޝަރީއަތުގެ މަޖިލީހުގައި ވެސް ސިއްހީ ހާލުކޮޅު ރަނގަޅު ނޫން ކަމަށް ވިދާޅުވެފައިވެ އެވެ.
ހައްޔަރުކުރި އަމުރު އިސްތިއުނާފު މާދަމާ ފަށާއިރު މަނީ ލޯންޑްރިން މައްސަލާގެ ޝަރީއަތް އަދި ނުފަށަ އެވެ. އެމަނިކުފާނުގެ އެކައުންޓް ވެސް ފްރީޒްކުރަން ކުރިމިނަލް ކޯޓުން އަމުރެއް ނެރެފައިވެ އެވެ. އެ އަމުރުގެ އިސްތިއުނާފު އަޑުއެހުންތައް ހައިކޯޓުން ނިންމާލައި ހުކުމް އިއްވުމަށް ވަނީ ތައްޔާރުވެފަ އެވެ.