ކޮލޮމްބޯ (ސެޕްޓެމްބަރު 1) - މަރަށް ހުކުމް ކޮށްފައިވާ ކެންޑިޑޭޓަކު ސްރީލަންކާގައި ބޭއްވި އާއްމު އިންތިހާބުގައި ގޮނޑިއަކަށް އިންތިހާބުވެފައިވާއިރު، އޭނާއަށް މަޖިލީހަށް ހާޒިރު ނުވެވޭނަމަ، އެ ގޮނޑި ލިބޭނެ ކެންޑިޑޭޓަކު ހިޔާރު ކުރާނީ ޓޮސް ކޮށްގެން ކަމަށް އެ ގައުމުގެ އިލެކްޝަންސް ކޮމިޝަނުން ބުނެފި އެވެ.
ލަންކާގެ ކުރީގެ ޕަވާ އެންޑް އެނާޖީ ޑެޕިއުޓީ މިނިސްޓަރު ޕްރޭމަލާލް ޖަޔަސޭކަރަ ވަނީ ސަރުކާރު ތަމްސީލް ކުރާ ސްރީލަންކާ ޕޮޑުޖަނަ ޕެރަމުނަ ޕާޓީގެ (އެސްއެލްޕީޕީ) ޓިކެޓުގައި ރަތުނަޕުރަ ޑިސްޓްރިކްޓްގެ މެންބަރު ކަމަށް އިންތިހާބުވެފަ އެވެ.
ނަމަވެސް، ލަންކާގެ ބަންޑާރަ ނައިބު ވަނީ ހުކުމުގެ ސަބަބުން، ޖަޔަސޭކަރައަށް ޕާލިމަންޓަށް ހާޒިރުވެ، ވޯޓު ނުދެވޭނެ ކަމަށް އަންގަވައިފަ އެވެ.
އެގޮތުން، އޭނާގެ ގޮނޑި ގެއްލޭ ހާލަތެއްގައި، ދެން އެ ގޮނޑި ތަމްސީލު ކުރާނީ އެސްއެލްޕީޕީއިން ދެވަނައަށް އެންމެ ގިނަ ވޯޓު ލިބުނު ކެންޑިޑޭޓުކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
ނަމަވެސް، އެ ލިސްޓުގައި ދެވަނާގައި ދެ ބޭފުޅުން އެބަ ތިއްބެވި އެވެ. އެގޮތުން، ރަންޖިތު ބަންޑާރަ އާއި ސަނީ ރޯހަނަ ކޮޑިތުވަކު އަށް ވެސް ލިބިވަޑައިގެންފައިވަނީ 53،261 ވޯޓެވެ.
ދެ ކެންޑިޑޭޓުންނަށް ވެސް އެއް އަދަދަކަށް ވޯޓު ލިބިފައި ވާތީ، ގޮނޑި ލިބޭ ކެންޑިޑޭޓަކު ކަނޑައަޅާނީ، ޓޮސް ކޮށްގެން، ދިމާވާ ކެނޑިޑޭޓަށް ކަމަށް ލަންކާގެ އިލެކްޝަންސް ކޮމިޝަނާ ޖެނެރަލް ސަމަން ރަތުނަޔަކަ ވަނީ ވިދާޅުވެފަ އެވެ.
މިއީ ލަންކާގެ ތާރީހުގައި ފުރަތަމަ ފަހަރަށް މިފަދަ ހާލަތެއް މެދުވެރިގެން، ގޮނޑިއެއް ކަނޑައަޅަން ޖެހޭ ފުރަތަމަ ފަހަރެވެ.