ޑރ. މުހައްމަދު މުއިއްޒަކީ ތައުލީމީ ގޮތުން ފާހަގަ ކޮށްލެވޭ ތަޖުރިބާއާ ގާބިލްކަން ހުރި ބޭފުޅެކެވެ. ސަރުކާރުގެ ވަރަށް އިސް މަގާމުތައް ފުރުއްވާފައިވާ ޑރ. މުހައްމަދު މުއިއްޒު ވަނީ ހައުސިން މިނިސްޓަރުކަން ހަތް އަހަރު ދުވަހު ކުރައްވާފަ އެވެ. އެ މުއްދަތުގައި މާލެ ސިޓީއަށް ތަރައްގީގެ މުހިންމު ބަދަލުތަކެއް އެ ދާއިރާއިން ގެނެސްދެއްވެވި އެވެ. ރާއްޖޭގައި މި ފަހުން ހިންގި ތަރައްގީގެ ބޮޑެތި މަޝްރޫއުތަކުގައި އެންމެ މުހިންމު ދައުރެއް އަދާކުރެއްވި އެއް ބޭފުޅަކީ މުއިއްޒު އެވެ. މާލެ ހުޅުލެ ގުޅުވާފައިވާ ބްރިޖް މަޝްރޫއާއި ހުޅުލެ އާއި ހުޅުމާލެ ގުޅުވާފައިވާ ހައިވޭގެ މަސައްކަތާއި މާލެ ސިޓީގެ މަގުތައް ޒަމާނީ ފެންވަރަށް ހެދިގެން ދިޔައީ މުއިއްޒުގެ މިނިސްޓަރު ކަމުގައެވެ. ހިތްފަސޭހަ ތަނަކަށް މާލެ ހެދުމަށް މާލޭގައި ގިނަ ޕާކުތަކަކާއި މައިދާންތަކެއް ހެދި އުފާވެރި މާހައުލަކަށް މާލެ ބަދަލު ކުރެއްވީ ހައުސިން މިނިސްޓަރަކަށް މުއިއްޒު ހުންނެވި ދުވަސްވަރުއެވެ.