މާލެ، 27 ސެޕްޓެންބަރު 2021 -- އިންޑިއާގައި ތަމްރީން ހަދަމުން ދަނިކޮށް ނިޔާވި އެމްއެންޑީއެފްގެ ލާންސް ކޯޕްރަލް މުހައްމަދު ސުލްތާންގެ ހަށިގަނޑު ރާއްޖެ ގެނެސް ޖަނާޒާގެ ކަންކަން އަސްކަރީ ޝަރަފުގައި ވަނީ ބާއްވާފައެވެ. ސުލްތާންގެ ޖަނާޒާ ކުރިއަށް ގެންގޮސްފައިވަނީ މަޣުރިބު ނަމާދަށް ފަހު އެވެ. ސުލްތާންގެ ޖަނާޒާގައި ވަރަށް ގިނަ ބަޔަކު ބައިވެރިވިއެވެ. ސުލްތާން ނިޔާވުމާއި ގުޅިގެން ސިފައިންގެ މަރުކަޒުތަކުގައި ސިފައިންގެ ދިދަ ވަނީ ބައިދަނޑިއަށް ތިރިކޮށްފަ އެވެ. ސިފައިންގެ ތަރުޖަމާން ވިދާޅުވީ ސުލްތާންގެ ކުއްލި ވަކިވުމާއި ގުޅިގެން އެ ހިތާމާގައި ބައިވެރިވުމުގެ ގޮތުން އިއްޔެ ގެ އިރުއޮއްސި 6:00 އިން ފެށިގެން 48 ގަޑިއިރަށް ސިފައިންގެ މަރުކަޒުތަކުގައި ސިފައިންގެ ދިދަ ބައިދަނޑިއަށް ތިރިކޮށްފައިވާ ކަމަށެވެ. -- ހުމާމް އަހުމަދު | އަވަސް